Karakateko zentral eolikoaren promotoreak proiektua atzera bota du

Karakateko zentral eolikoaren promotoreak proiektua atzera bota du
2023/12/28 eta kitto!
Soraluzeko, Elgoibarko eta Bergarako Karakate Bizirik Plataformek jakinarazi dutenez, Karakaten zentral eolikoa eraikitzeko Green Capital enpresak zuen asmoa bertan behera laga du. Plataformek “emozioz” hartu dute albistea eta, nabarmendu dutenez, “proiektu horrek suposatuko lukeen suntsipenetik babestuta geratuko da, momentuz behintzat, Karakate. Guk zalantzarik ez dugu herri bezala eman dugun erantzuna funtsezkoa izan dela enpresak erabaki hori hartzeko orduan”. Ez da hau horrelako egitasmoa atzera botatzea lortu duten lehen aldia, 2002an ere lortu baitzuten Karakateko zentral eolikoaren proiektua geratzea.

Aipatutako taldeek elkarrekin zabaldu duten adierazpenari jarraituz, “oraingoan ere lortu dugu Karakateko zentral eolikoaren proiektua geratzea. Green capital enpresak bertan behera utzi du Akillar eta Otsoaldasoro inguruetan aerogeneradore erraldoi bana jartzeko zuen asmoa. Green Capital-en matrizea den Capital Energy enpresak berak berriki aurkeztu ditu Trekutz (Antzuola-Urretxun) eta Buruzaiko (Azkoitia-Azpeitia-Zumarraga) zentral eolikoen ingurumen txostenak, eta bertan izan genuen lehenengoz erabakiaren berri esplizituki. Ondoren, enpresaren iturrien bidez konfirmatu ahal izan dugu hala dela. Hala ere, nahiz eta bigarren aldiz proiektuak atzera bota izana poztasunez hartu, garaipena ez da behin betikoa: mehatxuak hor dirau. Batetik, orain onartzeko fasean dagoen Energia Berriztagarrien Lurralde Plan Sektorialak (PTS) ez duelako gure mendi lerro kuttunaren erabateko babesa bermatzen eta etorkizunean proiektu berriak aurkezteko atea irekita uzten duelako. Izan ere, herritarrek, Karakate Bizirik-ek eta zein Udalek Karakateko eremu guztia babesteko Lurralde Plan Sektorial horri aurkeztutako alegazioak ez dituzte onartu, eta beraz, gure mendi gaineko biodibertsitateak eta ondare kulturalak nolabait arriskuan jarraituko du erabateko babes horren faltan. Horren aurrean berresten dugu ezinbestekoa dela Karakateko eremu osoa salbuespen eremu bezala izendatua izatea. Bestetik, Karakateko proiektua geratzea lortu arren, Euskal Herri osoan zehar aurrera jarraitzen dute mendi askotako tontorretan 200 metroko altuerako haize errotak eraikitzeko proiektuek. LPS-an ere ugari dira halakoak eraikitzeko balizko kokapen bezala ageri diren mendi eremuak, besteak beste gure eskualdean Arno ingurua eta Andutz mendia Itziarren. Ez da baztertzekoa, hortaz, eskualdean bertan proiektu berriak agertzea. Denak ere enpresa pribatuen, energiaren lobby-aren eta kapitalaren interesen mesedetan”.

Energia berriztagarrien alde daudela argi laga nahi dute, “baina ez horrela, ez edozein preziotan, bestelako ereduei jarraituz baizik. Gure mendiak babesteko beharra sentitzen dugu, gure ingurune naturala zaintzekoa, eta asmo horretan irmo jarraituko dugu. Ezin dugu mundu finitu batean hazkunde infinitu bat bultzatu, eta horixe da sistema kapitalistaren oinarrizko kontraesana. Ezinbestekotzat jotzen dugu bestelako ereduak, alternatibak, proposamenak… ezagutzen eta aztertzen jarraitzea eta energiaren auzia gizarteratzen eta haren gainean hausnarketa elikatzen jarraitzea da gure asmoa”.

Karakate Bizirik plataformatik lortu duten garaipenaren garrantzia nabarmendu nahi dute: “Arazo konplexu horren konponbide orokorra ez dela badakigun arren, mugarri bat behintzat ezarri dugula uste dugu. Nola ez, eskerrak eman nahi dizkizuegu bide honetan gurekin bat egin duzuen eta era batera edo bestera  lagundu diguzuen herritar eta elkarteei, baita Soraluze, Elgoibar eta Bergarako Udalei ere, prozesu honetan Karakate babesteko egin duten lanagatik, eta Aranzadi Elkarteari mendi lerroan dagoen ondare historikoa ezagutzera eman eta babesteagatik”.