Kartoia eta ontzi arinak biltzeko edukiontziak aldatuko dituzte, emaitzak hobetzeko asmoz

Debabarreneko Mankomunitateak gaikako bilketaren emaitzak hobetzeko lanean jarraitzen du eta, horrela, hondakinak edukiontzietara botatzea erraztuko duten edukiontzi berriak jarriko dira papera eta kartoiak biltzeko, baita ontzi arinak biltzeko ere. Hala adierazi zuen barixakuan Igor Aldalur Ingurumen teknikariak: “Orain arte erabili diren iglu itxurako edukiontzi urdinak eta horiak kendu eta berriak ipiniko dira eskualdeko herri guztietan. Guztira 496 edukiontzi aldatuko ditugu. Asmoa gaikako bilketa erreztea, herritarrentzat erosoagoa izatea da, eta, horretarako, kontenedore berrien ahoak albo batean daude eta, gainera, handiagoak dira. Horrekin batera, zerbitzua bera hobetuko da, hondakinen jasoketa azkartuko delako. Eta, horrez gain, edukiontzi-irlen uniformitatea ere lortuko dugu”. Aldaketari esker lortu nahi den helburu nagusia gaikako bilketaren portzentaiak gora egitea da: “Gaur egun, gure eskualdeko gaikako bilketa-maila %53 inguruan dago, eta %55era ailegatzea da asmoa”.

Mutikun hasiko dira edukiontzi berriak jartzen, azaroaren 6an, eta azaroan zehar aldatuko dituzte gainerako herrietan ere. Eibarren, azaroaren 14tik 20ra bitartean egingo dute aldaketa eta guztira 139 edukiontzi ordezkatuko dira. Zerbitzu berria abenduaren 1ean ipiniko da martxan eta Prezero enpresak emango du. Mankomunitateak zortzi urteko kontratua sinatu du enpresarekin, “gehienez 8.153.675 euroko aurrekontuarekin, kontuan hartuta enpresak kobratuko duen zenbateko osoa aldakorra izango dela jasoko dituzten edukiontzi kopuruaren arabera. Kontratuak paperaren eta kartoiaren frakzioen bilketa, ontzi arinena eta pilena barne hartzen ditu, baita edukiontzien garbiketa ere”.

Bestalde, eskualdean aldatuko diren edukiontziak identifikatzeko, ““Agur!” dioen pegatina bat jarri die Mankomunitateak, herritarrek jakin dezaten laster edukiontzi hori karga lateraldun baten ordez aldatuko dela”.