Mercadonak langile bat kaleratu duela salatzeko elkarretaratzea egin dute

Aurreko astean Eibarko Mercadonako langile bat kaleratu zutela eta, LAB sindikatuarekin bat, hori salatzeko elkarretaratzea egin da gaur eguerdian, Otaola Hiribidean dagoen dendaren aurrean. Sindikatutik adierazi dutenez, “ez da kaleratu duten lehena eta, zoritxarrez, ez da azkena izango. Oraingo honetan, emakume bat bota dute kalera, diziplina-kaleratze baten bidez, gezurrezko arrazoiak argudiatuz. Praktika hau oso ohikoa ari da bihurtzen Mercadona bezalako supermerkatu kate handietan. Sektore feminizatua izanik, eta prekarizatua aldi berean, langileak kontrolpean izatea da enpresa hauen helburua. LAB sindikatuan ez gaude hori onartzeko prest”.

Azaldutakoari jarraituz, supermerkatuko langile komitea CCOO eta UGT sindikatuak osatzen dute gehiengoz, “eta, horren ondorioz, beraien lan hitzarmena estatu mailako da. Erabakiak eta lan eskubideen arautzea Euskal Herritik kanpo hartzen dira, hemengo errealitate sindikalaren aitortza ukatuz”.

Gauzak horrela, estatu mailako hitzarmen horri lotuta daude lan-baldintzak ere: “Soldata-taula baxuak dira nagusi, eta lanaldi partzialak dituzte orokorrean. Honek  enpresari aukera ematen dio lanaldi malguak inposatzeko, ekoizpenaren une bakoitzeko langile-kopurua doitzeko. Lanaldi eta ordutegi horiek zailtasun handiak eragiten dizkiete langileei, beraien lana eta familia-bizitza uztartzeko. Gainera, erostetxe horietan sindikatuen aurkako politika egiten da, biltzeko eskubidea zailduz, zerrenda sindikaletan dauden langileak psikologikoki presionatuz, sindikalistak lanetik baztertuz edo patronalak kontrolatutako sindikatu horiak sortuz”.