Miguel Arroitajauregi idazleak ‘Transiciones’ liburua aurkeztuko du ostegunean, Portalean

‘Perdedores y vencidos’ lanarekin arrakasta lortu ondoren, Miguel Arroitajauregi idazle eibartarrak ‘Transiciones’ liburua aurkeztuko du ostegunean, 19:00etan, Portaleko areto nagusian.

Arroitajauregiren lehen eleberrian historiak pisu nabarmena zuen, fikzioarekin uztartu bazuen ere, eta oraingoan pisu hori arindu den arren, denboran atzera egingo dugu bertan kontatzen den istorioa ezagutzeko.

Nobelan trantsizio historiko eta errealak ikusten ditugu, hala nola Ekuatore Gineakoa, koloniatik probintziara eta ondoren bere erabateko independentziara igaroz, edo Espainiako Trantsiziokoa, diktaduratik demokraziara.

Baina Arroitajauregik kontatu digunez (egun hauetan argitaratuko dugu egin diogun elkarrizketa) horiekin batera beste trantsizio batzuk ere agertzen dira, pertsonalak, guztiz fikziozkoak diren pertsonaia batzuenak, eta haiengandik haurtzarotik nerabezarora eta gaztarora igarotzea erakusten zaigu, horrek dakarren guztiarekin: belaunaldien arteko borroka, ideologikoki heltzea, konpromiso politikoa, sexu-ernatzea, eta abar.

Bi emakume gazteren arteko adiskidetasun harremanetan nagusitasun edo menpekotasun jarrerak ere presente daude, euren gorabehera, zalantza eta desadostasunekin.