Monica Matabuena abeslaria arituko da domekako Portalea Musika Klubean

Monica Matabuena izango da hilabete honetako protagonista Portalea Musika Klubeko emanaldian. Abeslariak domekan eskainiko du bolero-jazz estiloko kontzertua, arratsaldeko 19:00etan hasita, Portaleko areto nagusian. Eskainiko dituen kantuetan Marco Martinez gitarra, Ander García doublebass eta Miguel Benito bateria izango ditu lagun. Urteetako heltze prozesu motel baten ondoren, Madrilen bizi den Monica Matabuena Getxoko kantariak bere estreinako diskoa plazaratzeko unea iritsi zaiola erabaki du: Matabuenapura.

Berezko konposaketa eta bertsio bitxien artean dotorezia osoz nabigatzeko aukera ematen dion ahots zoragarri baten jabe da Monica Matabuena. Gaztelupeko Hotsak-etik diotenez, “hondartzako arrats baten moduko ahots berotsu eta barea. Emeki urruma etengabea egin arren, ez da inoiz  beste soinuen gainetik inposatzen. Abesti  guztien argia eta gidaria da, baina ez gaitu inoiz itsutzen eta lagun dituen instrumentuei arnas hartzeko espazioa ematen die, nota eta ehundura musikalen arteko harremana, gozamena eta inprobisaziorako jokoa ahalbidetuz beti. Iturri aski ezagun eta guztiz onartuetatik edaten du bai, baina diskurtso guztiz pertsonala eta garaikidea eraikitzeko gai da, aldi berean. Bere kantuetan, Maria Joao, Camila Meza, Bill Frissell edo Paul Motian moduko artisten arrastoa sumatu dezakegu. Soleá kutsuko jazz modala aurki dezakegu eskoziar folk balada batena, baita espainiar abesti tradizionalari eginiko omenaldi eder bat ere, “Ojos Verdes” kantuan. Sustrai musikalen ezagutza sakona eta haienganako errespetu osoa birrasmakuntza eta ezustekorako gaitasun bikain batekin elkartzen dira hemen”.