Musikaz eta jai-giroaz beteko da Untzaga zapatuan, Gazte Egunaren harira

Musikaz beteriko Gazte Eguna antolatu dute zapatu honetan IPQ kuadrillak eta Eibarko Udalak Untzaga plazako karpan. Hiru kontzertuz osatutako egitaraua izango da, gazteentzako aisialdi-eskaintza zabaltzeko eta herriko jai-giroa indartzeko helburuarekin.

Eguerdiko 12:00etan emango diote hasiera festari, txosnaren irekierarekin. Kontzertuak arratsaldean hasiko dira, 19:00etan, Rock You taldearekin. Rock eta rock-pop estiloak lantzen dituzte, ingelesez zein gaztelaniaz egindako bertsioekin. Antolatzaileen esanetan, “rock hutsa, betiko klasiko handiez gozatzeko”.

Ondoren, 23:30ean, Los Zopilotes Txirriaos talde nafarraren kontzertua izango da. Taldeak sortu duen “Napar-Mex” estiloak Mexikoko rantxera klasikoa eta Nafarroako rock eta punkaren indarra uztartzen ditu, antolatzaileen arabera, “fusio perfektuan”.

Azkenik, 01:30ean, Iker Rodriguez “DJ Roka” berriztarraren txanda izango da. Musika urbanoaren klasikoak eskainiko ditu, besteak beste, Tego Calderon, Don Omar, Ñengo Flow, La Mafia del Amor, Tito el Bambino eta Plan B taldeen abestiekin.