Programazio berezi batekin ospatuko da Portalea kultur etxearen 30. urteurrena
Agirre y Aranzabal arma tailerra izan zena birmoldatu eta gero, Portalea eraikina 1996ko irailaren 28an zabaldu zen eta, harrezkero, herritarrentzako, bertako elkarteentzako eta euskal sortzaileentzako erreferentziazko gune bihurtu da. 30. urteurrenaren harira antolatu dituzten jardueren artean, hiru hamarkada hauetan Portalean beren lanak erakutsi dituzten hirurogei artista baino gehiago bilduko dituen erakusketa izango da garrantzitsuena. Azaldu dutenez, “bakoitzak bere ibilbideko obra adierazgarri bat ekarriko du, helburua baita erakusketa-aretoa euskal sorkuntza artistikoaren hogeita hamar urteko ibilbidearen lekuko izatea”. Lanak irailaren 18tik urriaren 25era bitartean egongo dira ikusgai.
Irailaren 24tik urriaren 6rako antolatu den hitzaldi-zikloan, berriz, gonbidatu ezberdinak egongo dira: Jesus Nuñez, Alfons Martinell, Amaia Gonzalez Llamas, Jon Sarasua eta beste hainbat. Adierazi dutenez, hitzaldi-zikloan kulturguneek kontsentsurako, berdintasunerako, lankidetzarako, elkargunerako eta garapen jasangarrirako betetzen duten funtzioaz gogoeta egingo da.
Gainera, irailaren 25ean eta urriaren 2an ate irekien egunak egingo dira, herritarrek zentroaren eguneroko funtzionamendua eta bertan dauden zerbitzuak ezagutu ditzaten.
Alkatearen berbetan, “Portaleak Eibarrek azken hamarkadetan egin duen inbertsiorik onenetarikoa irudikatzen du. Ez da eraikin bat bakarrik, herriaren identitatea indartzen lagundu digun espazio bizi bat ere bada, kultura, euskara, prestakuntza eta herritarren parte-hartzea bultzatzen duena”.
Bestalde, Andoni Zabala Kultura zinegotziak azpimarratu duenez, “urtemuga honetarako diseinatutako programak iraganari harrotasunez begiratu nahi dio, baina baita Portalearen etorkizuna proiektatu ere. Espazio honetatik azken hogeita hamar urteetan igaro diren artista asko bilduko ditu erakusketak, eta hitzaldiek, berriz, kultur ekipamenduek topaketarako, elkarbizitzarako eta sorkuntza partekaturako leku gisa bete behar duten zereginari buruz hausnartzera gonbidatuko dute. Herritar guztiek ospakizun honetan parte hartzea nahi dugu, Portalea Eibarko historia kolektiboaren parte delako”.
9 milioi bisita 30 urtetan
Inauguratu zenetik, Portalean hainbat udal zerbitzu egon dira, hala nola Euskaltegia, Juan San Martin Liburutegia, Dibujo Eskola, Zeramika Eskola, Juan Bautista Guisasola Musika Eskola, Armagintzaren Museoa eta hainbat udal sail; horrez gain, herriko dozenaka elkarte eta talderen ohiko egoitza ere bihurtu da.
Gaur egun, ehun pertsona inguruk egiten dute lan eraikinean: irakasleak, teknikariak eta administrariak, tailerretako monitoreak, mantentze-lanetako langileak, garbitzaileak eta ostalariak.
Juan San Martin Liburutegia da jende gehien biltzen duen guneetako bat, 3.778.858 bisita izan baititu ireki zenetik. 1996an 12.000 dokumentu inguru izatetik 90.969 izatera pasatu da, eta bazkideen kopurua, berriz, hazi egin da, hasieran 1.273 zituen, eta gaur egun 13.352.
Erakusketa-aretoa euskal arte plastikoen erreferenteetako bat da: 400 erakusketa inguru egin dira, eta 135.000 bisitari etorri dira bertara. Eskualdeko artista hasi berriek zein lehen mailako figurek erakutsi dituzte beren lanak.
Bestalde, 2007an inauguratu zen Armagintzaren Museoak 6.000 objektu inguru, mila bat arma historiko, 6.000 dokumentu eta ehun bat artelan gordetzen ditu, Eibarren XIV. mendetik gaur egunera arteko bilakaera industriala ezagutzeko aukera ematen dutenak.
Hogeita hamar urte hauetan zehar, Portalean hitzaldiak, erakusketak, ikastaroak, bilerak eta era guztietako jarduerak egin dira urtero, ehun bat elkarte kultural, sozial, enpresarial eta sindikalek bultzatuta. Halaber, kulturaren, unibertsitate-munduaren, politikaren eta kirolaren pertsonalitate nabarmenak ere hartu ditu, eta Euskadiko elkargune eta hausnarketarako gune nagusietako bat bihurtu da.
Zifrek ekipamenduak lortu duen dimentsioa islatzen dute: bederatzi milioi bisita inguru bere zerbitzu eta espazio guztien artean, 105.000 erabilera baino gehiago bilera-areto eta ikastaroetan, eta 1,1 milioi asistentzia baino gehiago Dibujo, Zeramika, Musika eta Kezka Dantza Eskoletara.
