SENIDE, alzheimerra dutenei zuzendutako proiektua

Ilusio handiz jaso dute 2023ko On Ekin saria Senide proiektua aurkeztu duten bost gazteek. UNI Eibar-Ermuko ikasleak dira. Plataforma Anitzeko Aplikazioen Garapena goi-mailako zikloan ikasten dihardute. Jon Telleria eibartarra da horietako bat eta, berarekin batera, inguruko beste herri batzuetako ikasleak daude: Haritz Arruabarrena (Mutriku), Alberto Cáceres (Antzuola),  Gerson Calo  (Deba) eta Gorka Garcia (Soraluze). "Ez genuen espero sari nagusia irabaztea. Proiektu asko eta oso kalitate onekoak aurkeztu dira eta guretzako poz handia izan da", diote.

Bost ikasleek ikasketa proiektu gisa sortu dute Senide ideia, eta orain ikertzeko eta proiektua gauzatzeko asmoa dute. Adimen artifizialeko aplikazio baten erabileran zentratutako proposamena da, gaitasun kognitiboak murriztuta dituztenei laguntzeko, telefono-deiei erantzunez, euren senide edo zaintzaileek ezin dutenean egin."Merkatu-ikerketa bat egin genuen eta konturatu ginen bazegoela antzerako gauza bat, baina horretan  ez zela inteligentzia artifiziala erabiltzen. Gaur egun inteligentzia artifiziala oso bogan dago eta teknologia oso aurreratuta dago. Kode irekiko teknologiak eskura ditugu gainera. Beraz, berrikuntza horiek oso sinpleak diren aplikazioetan sartzea pentsatu genuen", azaldu digute.

"Dementzia eta alzheimerra daukaten pertsonek, batez ere hasierako fasean, askotan deitzen diete telefonoz euren ingurukoei eta etxekoei.  Eta erantzuten ez badiete  estutu  eta urduri jartzen dira. Aplikazio honek deia txatbot batera desbideratzen du eta, inteligentzia artifizialaren bidez, txatbot horrek bere senidearen ahotsarekin erantzuten dio. Elkarrizketatxo bat eduki dezakete eta hori grabatu egiten da, gero benetako senideak irakur dezan. Txatbotak detektatzen badu pertsona hori arriskuan dagoela (erori egin dela, galduta dagoela  edo edozer gauza gertatu zaiola), kontaktuei deitzen die eta, beharrezkoa ikusten badu, larrialdietara deitzen du", esan digute.

On Ekin sariak euren ideia aurrera eramateko bultzada handia eman diela diote irabazleek.  "Lehen ez geunden hain seguru, baina asko gustatu dela ikusi dugu eta horrek asko animatu gaitu aurrera egiten  jarraitzeko".