Txema Pascual, okina: "Ogiarekin jaten duzunak loditzen du, ez ogiak"
- Zer eskainiko duzue otsailaren 11ko dastaketa saio horretan?
Aldi berean dastaketa eta hitzaldia izango den horretan ogi bat zelan egiten den azalduko dugu. Egiteko beharrezkoak diren osagaiak, izan daitezkeen prozedurak, erabili beharreko legami naturalak... Noski, hainbat ogi ere dastatuko ditugu.
- Nondik nora doaz azken berritasunak arlo horretan?
Berritasunak, hitzak esaten duen moduan, beti daude. Etengabeko prozesua da ogia egitearena. Beti dago hobekuntza fasean: erabili beharreko prozedurak eta irin motak aldatzen doaz, ogiaren zaporea eta bere egitura hobetzeko bidean.
- Garia eta zekalea dira gehien erabiltzen diren lehengaiak? Badira beste batzuk?
Egia da garia eta zekalea direla gehien erabiltzen direnak, baina badira beste lehengai batzuk ere: espelta, artoa eta oloa, esaterako. Gutxiago erabili arren, ezin dira ahaztu sesamo, lino edo amapola haziak.
- Gero eta ogi mota gehiago daude okindegietan? Beharrezkoa da hainbeste egotea?
Bai, jendeak gero eta aukera gehiago du bere gustoko ogia erosteko. Hala ere, niretzat mota asko egoteak ez du garrantzia handirik. Erreparatu behar diogu egiten den ogia kalitatezkoa izateari; horrek du benetako garrantzia.
- Ogiak loditu egiten du? Zenbateraino? Ogi integrala gehiago saltzen da?
Ogiak gizentzen duela... Hori mito bat besterik ez da. Benetan loditzen duena da ogiarekin jaten duzuna. Orokorrean begiratuta, beste gauza askotan bezala, neurrian dago sekretua: segun eta zenbat kaloria erretzen dituzun, horren arabera jan behar duzu, ez dago besterik. Egia da, bestalde, ogi integrala ongi saltzen dela. Horren zergatia non dagoen? Nik esango nuke batez ere fibra gehiago daukalako.
- Okinak sekretu asko dituzue? Gorde egiten dituzue?
Sekretuak ez; ez da hainbesterako. Bai, gure ohiturak ditugu, gure trikimailuak... desberdinak egiten gaituztenak. Baina, egia esateko, ogia egitea erraza da. Baina horrek badu beste aurpegi bat ere: ogi on bat egunero egitea... hori askoz ere konplexuagoa da.
