61. Durangoko Azoka, adimen artifizialaren mehatxuari begira
Adimen artifizialaren hedapenaren aurrean, giza sorkuntzaren balioa aldarrikatuko du aurten Durangoko Azokak. Abenduaren 4tik 8ra egingo dute 61. edizioa, Landako Gunean, eta euskarazko eta Euskal Herriko kulturaren erakusleiho izateaz gain, sortzaileen lana aitortzeko eta kulturzale berriak erakartzeko topagunea izango da.
Gerediaga elkarteak atzo, urriaren 28an, aurkeztu zuen azokaren aurtengo iruditeria. Andoni Beristain diseinatzaile, argazkilari eta arte zuzendariak sortu du, sorkuntzaren atzean dagoen lana eta kulturaren aniztasuna ardatz hartuta. Horretarako, kulturaren hainbat arlotan erabiltzen diren objektuak bildu ditu irudietan, hala nola idazmakina, kamera analogikoa, margolarien paleta, walkmana eta kasetea.
Beristainen proposamenak sorkuntza analogikoaren balioa nabarmendu nahi du, teknologia berrien gorakadaren testuinguruan. Diseinatzailearen esanetan, tresna horietako askok bizirik jarraitzen dute gaur egun ere, eta batzuek indarrez berreskuratu dute beren lekua. Hala, iruditeriak sortzeko modu desberdinak erakusteaz gain, sorkuntzaren atzean dagoen giza lana jarri nahi du erdigunean.
Gerediaga elkarteko koordinatzaile Beñat Gaztelurrutiak ere sortzaileen ekarpena nabarmendu du. Haren hitzetan, sorkuntzak irudimena ez ezik, prestakuntza, lana, arreta eta iraunkortasuna ere eskatzen ditu. Horregatik, azokak sortzaileen lana aitortu eta ikusgarri egin nahi du aurtengo edizioan.
Iaz, 60. edizioaren harira, «DA! Kulturaren Jaialdia» izendapena hartu zuen azokak, eta aurten ere horri eutsiko dio. Antolatzaileen arabera, izen horrek azokaren izaera laburbiltzen du: askotariko kultur adierazpideak biltzea, sortzaileak eta hartzaileak harremanetan jartzea eta euskarazko kulturaren sustapenean eragitea.
Bestalde, kulturzale berrien interesa pizten jarraitzeko nahia agertu du Gaztelurrutiak. Azkenaldian euskarazko hainbat sortzaileren lanek piztu duten arreta nabarmendu du, eta jakin-min horrek aurrera egitea nahi dutela adierazi du. Horretarako, kultur eskaintza askotarikoa ezagutzeko eta sortzaileekin harremanetan jartzeko gonbita egin die herritarrei.
Azokako egitarau osoaren berri datozen asteetan emango dute. Antolatzaileek aurreratu dutenez, iaz baino aurkezpen gehiago izango dira aurten, eta bost egunetan zehar euskal kulturaren askotariko adierazpideez gozatzeko aukera izango dute bisitariek.
