Basalgo: mendietatik harago doan proiektua
Aerosorgailuak jartzea proposatu duten mendietara joan da …eta kitto!, proiektua bertatik ezagutzeko. Eibarko Mendiak Bizirik plataformako kideek eta inguruko baserritarrek proiektuak mendian izango lukeen eraginaz hitz egin digute, eta Eibarko alkateak udalaren ikuspegia azaldu du. Haien ahotsak eta mendian bertan ikusitakoa bildu ditugu erreportajean.
Basalgo ez da proiektu berria. Arena Power Solar 10 SLUk 2025eko udazkenean jarri zuen jendaurrean, Eibarko, Bergarako eta Soraluzeko mendietan sei aerosorgailu eraikitzeko proposamenarekin. Hasierako planteamenduan, hiru Bergaran, bi Eibarren eta bat Soraluzen kokatuko ziren. Ordutik, ordea, proiektua aldatu egin da: bost aerosorgailu proposatzen dira orain, hiru Eibarren, bat Bergaran eta beste bat Soraluzen. Potentzia ere 28 megawattetik 24,95era jaitsi da.
«Aerosorgailuak hiru udalerritan kokatuko dira, baina Basalgoren eragina ez da hor amaitzen: proiektuari lotutako azpiegiturek Elgeta eta Elgoibar ere ukitzen dituzte.»
Aerosorgailuetatik harago
Aerosorgailuak hiru udalerri horietan kokatuko lirateke, baina proiektua ez da haien kokalekuetara mugatzen. Proiektuari lotutako azpiegiturek Elgeta eta Elgoibar ere ukitzen dituzte. Makinak mendira eramateko bideak eta pistak egokitzea, plataformak eta bestelako instalazioak egitea eta elektrizitatea garraiatzeko linea eraikitzea aurreikusten da. 2025eko dokumentazioan, gainera, Basalgoko instalazioetatik Elgoibarko azpiestaziora energia eramateko 4,3 kilometro inguruko linea jasotzen zen, zati bat airetik eta bestea lurpetik.
Horregatik, proiektuaren eragina ez da aerosorgailuen kokalekuetara mugatzen. Bide eta pistetan egin beharreko lanek, lur-mugimenduek, plataformek eta gainerako azpiegiturek ere eragina izango lukete ingurunean. Ingurumen-inpaktuaren azterketan, besteak beste, lurzorua, landaredia, paisaia eta biodibertsitatea hartzen dira kontuan; hegaztiak eta saguzarrak ere aztergai dira. Inguruko baserriak eta nekazaritza eta abeltzaintza jarduerak ere proiektuaren eremuan daude. Eremuan, gainera, Gerra Zibilarekin lotutako lubaki eta bestelako aztarnak daude.
Proiektuak eragindako kezka
Proiektuaren inguruan sortutako kezkaren aurrean, Eibarko Mendiak Bizirik plataforma sortu zen 2025eko azaroan. Lehen alegazio-epean, 6.282 alegazio aurkeztu ziren Eibar, Soraluze eta Bergaran egindako kanpainetan. Plataformak 30 alegazio tekniko ere aurkeztu zituen, eta udalek ere alegazioak aurkeztu zituzten.
Orain, sustatzaileak proiektua aldatu eta ingurumen-inpaktuaren azterketaren eranskina aurkeztu du. Dokumentazio berria jendaurrean jarri da, eta alegazioak aurkezteko epea urriaren 14ra arte dago zabalik. Eibarko Mendiak Bizirikek, ordea, salatu du dokumentazio berria ez dela herritar guztien eskura egon, eta zalantzan jarri du aldaketek proiektuaren eraginak behar beste murrizten dituzten.
«Basalgoren eragina ez da aerosorgailuen kokalekuetara mugatzen: bideak, pistak, plataformak eta lur-mugimenduak ere egin beharko dira, eta horrek guztiak mendian izango duen eragina da kezka nagusietako bat.»
Zer aldatuko den oraindik zehazteke
Urriaren 14tik aurrera, administrazioek dokumentazio berria eta aurkeztutako alegazioak aztertu beharko dituzte. Orduan zehaztuko da proiektuak aurrera egingo duen eta, hala bada, zer itxura izango duen behin betiko.
Bitartean, proiektua aurreikusi duten mendietan bideak, baserriak eta basoak daude, eta bertan bizi eta lan egiten dutenek gertutik jarraitzen dute zer ekarriko lukeen Basalgok. Handik bertatik joan gara proiektua ezagutzera: mapan ageri diren aerosorgailuetatik harago, ukituko lukeen lurraldera eta bertan bizi eta lan egiten dutenen ahotsetara.
