Eibarko Udalak eta Debegesak HELDU! ekintzailetza programaren bosgarren edizioa jarri dute martxan

Zabaldu dute HELDU! ekintzailetza programan parte hartzeko epea. Izen-ematea uztailaren 20ra arte egongo da zabalik, eta aurtengoa bosgarren edizioa izango da.

Eibarko Udaleko Garapen Ekonomiko Sailak Debegesarekin lankidetzan antolatzen duen ekimena da, eta ideia berritzaile bat izan eta bere enpresa-proiektua Eibarren garatu nahi duen edonori zuzenduta dago. Programa Debegesako inkubagailuko instalazioetan garatzen da, eta hiru hilabeteko iraupena du.

Programaren bidez, parte-hartzaileek 130 ordu baino gehiagoko prestakuntza eta aholkularitza jasoko dute adituen eskutik. Ekimenak enpresa bat sortzeko hasierako fasean dauden pertsonei zuzenduta dago, eta proiektua garatzeko funtsezko alderdiak lantzen ditu: negozio-ereduaren definizioa eta baliozkotzea, hazkunde-estrategia, finantza-plangintza, marketin- eta salmenta-ekintzak, taldeen antolaketa eta lege-alderdien kudeaketa, besteak beste.

Antolatzaileen arabera, lehentasuna izango dute sektore estrategikoekin lotutako proposamenek, hala nola doitasun-ingeniaritzak, industriari lotutako zerbitzuek, 4.0 industriak, klima-aldaketak eta energia iraunkorrak edo kirolari aplikatutako teknologiek. Hala ere, ekimenak udalerriko ingurune sozioekonomikoari balio erantsia ematen dioten bestelako esparruetarako ere irekita dago.

Gainera, proiektuak hala eskatzen duen kasuetan, jarraipena egiteko aukera ere eskainiko da EHUNDU edo MAKE IN programen bidez.

Informazio gehiago jasotzeko, interesa dutenek Eibarko Udaleko Garapen Ekonomiko Sailarekin edo Debegesarekin harremanetan jar daitezke.