Euskal dantzaren transmisioa eta etorkizuna aztergai, Eibarren
Euskal dantzaren inguruko esperientziak, ikerketak eta erronkak partekatzeko elkartuko dira sektoreko hainbat lagun azaroaren 7an Eibarren. Dantzan Topaketak 2026 jardunaldia Markeskoa jauregian egingo dute, 09:30etik 17:30era, Dantzan elkarteak, Dantzaguneak eta Gipuzkoako Foru Aldundiak antolatuta.
Bosgarren edizio honetan, hainbat gai landuko dituzte: herri-kulturaren transmisioa hezkuntzan, adinekoen dantza-praktikak, genero-desberdintasunak eta dantzarien osasuna, besteak beste. Dantza berriek tradizio bihurtzeko zer behar duten ere aztertuko dute, eta nazioarteko esperientziak ezagutzeko aukera izango da.
Goizeko egitaraua herri-kulturaren transmisioari buruzko saioarekin hasiko dute. Alaitz Aizpuruk, Aritz Ibañezek eta Johañe Etxebestek hezkuntzaren eta euskal kulturaren arteko harremana izango dute hizpide. Ondoren, adinekoen dantza-praktikek dakartzaten onurak aztertuko dituzte Nekane Arriaga dantza-irakasleak eta Maialen Araolaza fisioterapeuta eta ikerlariak.
12:15ean, Puntuka tartean, lau gai jorratuko dituzte. Kepa Otaegik dantza berri bat tradizio bihurtzeko gakoak aztertuko ditu; Anartz Ormazak, berriz, Bakioko Itxas Alde dantza taldearen mendeurreneko ezpata-dantza aurkeztuko du. Leire Aldekoa-Otalorak Durangaldeko euskal dantzetako genero-desberdintasunak izango ditu aztergai, eta Mikel Sarriegik Musika eta dantza pintzelkadak proiektua aurkeztuko du.
Arratsaldean, Estoniako Tantsupidu dantza-jaialdia izango dute aztergai Iñaki Ahedo eta Arkaitz Pascuas dantzariek. 15:30ean hasiko den saioan, jaialdiaren transmisio-eredua, partaidetza, komunitatea eta korpus koreografikoa izango dituzte hizpide.
16:15ean, euskal dantzan lesioak prebenitzeko moduaz arituko dira Jaime Zubero eta Unai Iraola, bi ikerlanen emaitzak aurkeztuta. Maialen Araolazak gidatuko du saioa.
Jardunaldia amaitzeko, Oier Araolazak Kontrapasa eta Sautrela: Ialgi hadi dançara saioa eskainiko du, 17:00etan hasita.
