"Hizkuntzentzako saria"

Badirudi azkenaldian ikur berriak daudela zinemaren erakusleiho handienean, hau da, Hollywood-en. Orain dela gutxi, Parasite (Gisaengchung) filmak mugarria ezarri zuen, Pelikula Onenaren Saria irabaztea lortu baitzuen, Nazioarteko Pelikula Onena Saria irabazteaz gain. Azken honek orain dela gutxira arte Atzerriko Hizkuntzan Pelikula Onena Saria zeukan.  Izendapen aldaketa korapilatsuok zinemagintzan eta kulturgintzan gertatzen ari diren aldaketak islatzen dituzte: ikus-entzunezko arrakastatsuenak gero eta hizkera askotarikoetan mintzatzen dira. Ingelesez jarduten ez duen ekoizpen batek halako aitortza jasotzeak ikusgarritasuna eman dio bere hizkuntzetan egiten den zinemagintzari. Izan ere, ikusleriari arreta publikoa erakarri ohi duten lan estatubatuarrez gain  interesgarriak diren proposamenak badaudela ziurtatu dio. Modei jaramon egin ohi dion gizartean, pagotxa da bat-batean kaletarrak tropelean zinema aretoetara joatea askotan azpitituluekin kontsumitu beharko duten filmaz gozatzera. Zehazteke dago joera hori egonkortuko den, eta oihartzuna izango duen beste hizkuntza batzuetan landutako sorkuntzetan. Estatu mailan, aurten O que arde galiziarrez hitz egiten duen pelikulak zeresan handia eman du Goya Sarietan, bereziki Benedicta Sánchez Lugoko aktore hasiberriagatik. Gainera, ez dezagun ahaztu euskarazko Loreak-ek Oscarretan egoteko aukera izan zuela orain dela urte batzuk, beraz etorkizunerako bidean lehen urratsak eman ditugu. Noizbait entzungo ahal dugu norbait LA-ko Kodak Antzokian, Aitorren hizkuntzan ''eskerrik asko'' esaten!