Ane Gastesi Larrañagak ‘Anton dentistarenean’ ipuina aurkeztuko du Portaleko Areto Nagusian

Abenduaren 10ean, 18:00etatik 19:00etara, Portaleko Areto Nagusian, familia osoari zuzendutako liburu-aurkezpena egingo da. Odontologian 20 urte baino gehiagoko esperientzia duen Ane Gastesi Larrañagak bere azken lana, 'Anton dentistarenean', aurkeztuko du.

Gastesi, hortz-osasunaren dibulgazioan eta haurrei zuzendutako heziketan konprometitua, idazmena eta aho-hortzetako prebentzioa uztartzen ditu ipuin honetan. Helburua da haurrak eta familiak hortz-zaintzaren garrantziaz modu dibertigarrian kontzientziatzea.

Anton eta Perez Sagutxoren abentura

Ipuinak Anton du protagonista. Bere hortzekin zerbait arraroa gertatzen ari dela sumatuta, abentura zirraragarri bati ekingo dio haginlariaren kontsultan barrena. Bertan, baliteke Perez Sagutxoarekin topo egitea… baldin eta aurkitzea lortzen badu!

Aurkezpena familientzat pentsatuta dago, eta ipuinaren irakurketaz gain, egilearekin hitz egiteko eta hortz-zaintzaren inguruko galderak egiteko aukera ere izango dute bertaratuek.