Eibarko Mendiak Bizirik plataformak «Basalgo» proiektu eolikoari buruzko alegazioekin bat egiteko kanpaina abiatuko du asteburuan

Eibarko Mendiak Bizirik herri-plataformak abian jarri du «Basalgo» proiektu eolikoari buruzko alegazioekin bat egiteko kanpaina. Adierazi dutenez, “Eibar, Bergara eta Soraluzeko mendietan 200 metroko sei aerosorgailu jarri nahi ditu Arena Power enpresa andaluziarraren proiektuak, eta horrek kalte handiak eragingo lizkioke hiru herrietako natura-inguruneari, landa-inguruneari eta ondare historikoari”. 
Azaroaren 19an eratu zenetik, plataforma erlojuaren kontra alegazioak lantzen aritu dela adierazi dute, “hauek aurkezteko hasierako epea aste honetan bertan amaitzen baitzen. Hala ere, partikular askoren eskaerari erantzun zaio, eta abenduaren 22ra arte luzatu da epea, udalekin gertatzen den bezala”. 
Diotenez, luzatze horrek, kasu batzueetan konplexutasun tekniko handia duten alegazioak hobeto garatzen lagunduko du: “Hasieran aurreikusitako 30etatik 18 prestatu dira jada; askotariko alderdiei buruzkoak dira, batez ere lurraldekoak, ingurumenekoak eta hirigintzakoak”. 
Aldi berean, Eibarko Mendiak Bizirik-ek alegazioekin bat egiteko kanpaina bat jarri du abian, interesa duten herritar guztiek “Basalgo” proiektuaren aurka daudela adierazteko aukera izan dezaten. Horrela egin nahi dutene,k beren datuekin bete beharko dituzten dokumentuak prestatu ditu plataformak. Dagoeneko eskuragarri daude plataformaren hedapen-kanalean – gaurtik aurrera Eibarren banatuko diren karteletan txertatutako QR kodearen bidez sar daiteke –, asteburu honetan Untzagan Guridi tabernaren ondoan jarriko den informazio-puntuan jaso ahal izango dira, eta datozen egunetan jasotzeko eta entregatzeko gune berriak jarriko dira, “nahi duenak  dokumentua zuzenean Portalean entregatu badezake ere”. 
Eibarko Mendiak Bizirik-en ustetan, herri alegazioen garrantzia nabarmena da, aste honetan bertan Arena Power enpresak – «Basalgo» sustatzen duen enpresa bera – Bizkaiko Jata eta Sollube mendietan garatu nahi zuen parke eolikoaren makroproiektuarekin frogatu den bezala. Mugimendu herritarrek 3.300 alegazio aurkeztea lortu dute, eta enpresak uko egin dio aurrera egiteari. 

Informazio-puntua Untzagan
Alegazioekin bat egiteko kanpainarekin batera, Eibarko Mendiak Bizirik-ek «Basalgo» proiektuaren xehetasunak eta plataformaren lana ezagutarazi nahi ditu. Jarduerak asteburu honetan bertan hasiko dira. Azaroaren 29an, larunbata, eta azaroaren 30ean, igandea, informazio-puntu bat jarriko du Untzagan, Guridi tabernaren ondoan. Bertan, eskuorri informatiboak, pegatinak eta kartelak banatuko dira. Alegazioekin bat egiteko behar diren dokumentuak ere eskuragarri egongo dira. Datozen asteetan, kanpainan sakonduko dela aurreratu dute: “Jarduera informatibo gehiago antolatuz, eta alegazioak jasotzeko eta entregatzeko puntuak jarriko dira”.
Plataformak, bestalde, herritarrak eskaintzen ari diren babesa eskertu nahi du. Ildo horretan, aipatzekoa da change.org plataforman sinadura-bilketa zabaldu zuenetik pasa diren sei egun eskasetan, 1.100 sinadura baino gehiago lortu dituela. Horrekin batera, gogorarazi du informazio gehiago jaso nahi dutenek, edo parte-hartze aktiboagoa izan nahi dutenek, asteroko bilera irekietara joan daitezkeela. Asteazkenetan 18:30etan egiten dira, Kultun.