Eibarko Udalak ostalaritzako enplegu programa berri bat jarri du martxan

Eibarko Udalak, EDUKEIBAR Eibarko oinarrizko lanbide-heziketako zentroa kudeatzen duen enpresarekin lankidetzan, ostalaritzako formazioaren aldeko apustua egin du aurten ere, ekimen bat antolatuz langabezian dauden eta gizarte-bazterketan egoteko arriskua duten pertsonen enplegagarritasuna hobetzeko.

Programak —urriaren 28an hasi zena Azitaingo Oinarrizko Lanbide Heziketako Zentroan— prestakuntza teoriko eta praktikoko 120 ordu eskaintzen ditu, eta enpresetan praktikak egiteko aukerako 40 ordu. Udalerriko 15 langabek hartzen dute parte.

Aurreko edizioa, 2022ko udazkenean egin zena, oso arrakastatsua izan zela dio Udalak: "parte-hartzaileen %50ek aurkitu zuten lana (14tik 7k lortu zuten lana). Inpaktu horrek eta interesa duten enpresen eta erabiltzaileen eskari handiak bultzatu dute Udala ibilbide horren aldeko apustua egiten jarraitzera; izan ere, sektore hau oso irisgarria da prestakuntza-oinarri txikia duten pertsonentzat".

Vanesa Hortas Garapen Ekonomikoa, Enplegua eta Berrikuntza Saileko zinegotziak adierazi duenez, “Udala erabat konprometituta dago premia handiena dutenei aukerak eskaintzen dizkieten ekimenekin. Programa honek parte-hartzaileen enplegagarritasuna hobetzeaz gain, ostalaritzako sektorean dagoen premia bati ere erantzuten dio: pertsonal kualifikatuen beharra.”

Vanesa Hortasek, halaber, programaren izaera inklusiboa nabarmendu du: “programa hau bereziki kolektibo zaurgarrietan pentsatuta diseinatu da”. 

Ikastaroak ezagutza teknikoak eta bestelakoak eskaintzen ditu barran, jantokian eta terrazan lan egiteko, bai eta taberna eta kafetegietan pintxoak eta ogitartekoak prestatzeko ere. Edukiek lan-arriskuen prebentzioari buruzko prestakuntza ere jasotzen dute, gaztelaniazko eta euskarazko komunikazioa, eta baita elikagaien manipulatzaile-karneta ere. 

Asistentzia-irizpideak bete eta ebaluazioak gainditzen dituzten parte-hartzaileek elikagai-manipulatzaile-titulua lortuko dute. Helburuak lortzen dituztenek enpresetan egin ahal izango dituzte praktikak (AIZ badute); hala, partaideen ikasketa-prozesua sendotu egingo da. Gainera, prestakuntza-moduluen ziurtagiria jasoko dute; modulu hauek "Taberna- eta kafetegi-zerbitzuak" 2. mailako profesionaltasun-ziurtagiriari (HOTRO508) dagozkio. 

Amaieran, diploma emango zaie ikastaroa behar bezala amaitzen dutenei, eta profesionaltasun-ziurtagiri horretan trebatzen jarraitzeko bidea irekiko zaie. Kasu horretan, baliozkotuta izango dituzte programa honetan emandako moduluak.

Programak erabateko apustua egiten du garapen profesionalaren, inklusioaren eta tokiko lan-merkatuaren eskariei erantzutearen alde.