Emakumeenganako Indarkeriaren Kontrako Nazioarteko Eguneko egitaraua prestatu du Udalak
Azaroaren 25eko Emakumeen Aurkako Indarkeria Desagerrarazteko Nazioarteko Eguna dela eta, Eibarren prestatu den egitaraua askotarikoa eta herritarrei zuzendua izango da. Ekintzak azaroaren 3an abiatuko dira eta hilabete osoan zehar luzatuko dira.
Hasiera emateko, azaroaren 3tik 29ra bitartean, BUNA argazki erakusketa egingo da. Bertan, Etiopiako emakumeen ahotsak eta erresilientziak ikusgai egongo dira Egoaiziaren eskutik, Andretxean, 9:00etatik 12:30ak arte eta 16:30etik 19:30ak arte. Hilaren 17an, asteartean, bideo-foruma egingo da Pagatxa emakumeen elkartearen eskutik; kasu honetan, ‘Emakumeen historia egiten: Nagore Laffage’ gaia jorratuko da Andretxean, 17:00etan. Egun batzuk beranduago, azaroaren 20an, ostiralean, zine-foruma egingo da Armeria Eskolan, 17:00etan, ‘Una cuestión de género’ pelikularen proiekzioarekin, Pagatxa elkartearen eskutik.
Asteburura begira, azaroaren 22an, igandean, 12:00etan, Pamela Palencianoren ‘No solo duelen los golpes’ bakarrizketa ezaguna eskainiko da Andretxean. Egitarauarekin aurrera eginez, azaroaren 24an, asteartean, dokumental emanaldi eta solasaldi bat izango da Andretxean bertan, 18:00etan, ‘Isiltasunaren indarra’ lana ezagutzera emateko Egoaiziaren eta lantaldearen eskutik.
Udal Liburutegiak ere paper garrantzitsua jokatuko du, Juan San Martin liburutegiarekin elkarlanean irakurketa gida berezia prestatu baita, eta informazio-standak jarriko dira bai Andretxean zein Udal Liburutegian herritarren eskura.
Egun nagusia, azaroaren 25a (asteazkena), Untzaga plazan ospatuko da bi hitzordu nagusirekin. 11:30ean, ‘Indarkeria matxistaren aurkako matazak ehuntzen’ ekintza kolektiboa egingo da Altzoa Eibarko Emakume Alargunen Elkartearen eskutik. Ondoren, 13:00etan, herritarren elkarretaratze nagusia deituko da ‘Eibar Indarkeria matxistaren aurka’ lelopean.
