Ez ahaztu ordua atzeratzeaz zapatu gauean
Udako ordutegia Lehen Mundu Gerran ezarri zen lehen aldiz. ‘Gerrako ordutegia’ deitu zioten, eta energia-eskasiak bultzatuta ezarri zuten. Neurria eraginkorra zela ikusita, zenbait herrialdek gerra ostean ere udako ordutegia aplikatzen jarraitu zuten. Bigarren Mundu Gerraren ondoren, neurria gehiago zabaldu zen. Gaur egun ezagutzen dugun udako ordutegia 1973. urteko petrolio-krisiaren ondorio zuzena da. 1980az geroztik Europako Batzordeak erabakitzen du Europako estatuetan ordutegi aldaketa noiz egin behar den, eta 1996az geroztik estatu guztietan egun berean egiten da aldaketa hori.
GMT ordua (Greenwich Mean Time) Erresuma Batuko Greenwich behategian neurtzen den ordua da, eta urte osoan zehar berdin mantentzen da. 1884ko azaroaren 1ean, GMT ordutegia erreferentziako ordutegi unibertsala izango zela adostu zen, eta munduko ordu banaketa egin zen. Mundua 24 zatitan banatu zen, 12 Greenwichetik ekialdera eta 12 mendebaldera. Ekialderantz orduak gehitu egiten dira (zati bakoitzeko ordu bat) eta mendebaldera, berriz, kendu. Gu, Greenwichetik ordubete ekialdera gaude. Beraz, neguan ordubeteko aurrerapena dugu GMT orduarekiko eta udan, berriz, bikoa.
Europako herritarren %84 ordu-aldaketa kentzearen alde dagoen arren, urriaren amaieran gure erlojuak aurreratuko ditugu. Espainian, ordutegi-aldaketa bukatzearen aldeko biztanleen ehunekoa ez da hain handia (% 60), eta, bitxia bada ere, hirugarren adinaren aldekoa da gazteen artean baino. Eta %13,8k bakarrik aukeratzen du neguko ordutegia, eta %65,4k nahiago du udakoa, Ikerketa Soziologikoen Zentroaren (CIS) datuen arabera.
Hasiera batean, tentagarria dirudi udako ordutegia aukeratzea: horrela argi-ordu gehiago izango genituzke, eta neguko hilabeteetan ez litzateke inoiz ilunduko 19:00ak baino lehen. Hala ere, oraindik argitu gabe dagoenean eskolara edo lanera sartzea (eguzkia 9:00ak baino geroago aterako litzateke) ez da hain erakargarria, eta uste da produktibitatea aldaketarekin ahulduko litzatekeela. Gainera, gure jarduerak gehiago garatuko lirateke bero handieneko orduetan, eta aire girotuaren kontsumoa handituko litzateke. Abantailak, ordea, bistakoak dirudite: argi naturalaren ordu gehiagoz gozatuko dugu, eta lanetik ateratzean ez da gauez izango. Hori oso balioetsia da gurea bezalako herrialde batean, non ohikoa baita kalean egotea eta nahiko berandu arte aktibo egotea.
Dena dela, udako ordutegiaren gainean eztabaida handiak daude. Jende guztiak ez du uste hainbeste energia aurrezten denik, eta osasun-arazoak sortzen dituela ere esaten da. Momentuz, erlojuak berriro prestatu behar ditugu, eta eguneko orduak ahalik eta hobekien aprobetxatu.
