Gidatze-sistema berrietara egokitutako soluzio adimendunak diseinatzen dihardu Tekniker-ek

Ibilgailuko kideen eta gainerako bide-erabiltzaileen segurtasuna hobetzea da ADAS sistemen (Gidatzen Laguntzeko Sistema Aurreratuak) helburu nagusia. Hala ere, sistema hori martxan jartzea eta aplikatzea soluzio teknologiko eta elektroniko berriak behar dituen erronka tekniko garrantzitsua da, baina baita sistemak miniaturizatzeko diseinu-arloko erronka ere.

Erronka horiei aurre egiteko, Masermic enpresa gipuzkoarrak gailu bat garatu du. Teknikerrek hardware elektronikoaren, sentsore optikoen eta adimen artifizialaren (IA) diseinuan eta garapenean dituen ezagutzak eta esperientzia jarri ditu, sistemaren kameretan integratzeko.

"Gure soluzioek aukera ematen dute pertsonak, beste ibilgailu batzuk, semaforoak edo trafiko-seinaleak detektatzeko eta galtzadaren barruan duten kokapena zehazteko. Informazio hori, bideo-sekuentziarekin batera, automobila kontrolatzeko sistema elektronikoetara transmititzen da, eta gidatzeko laguntza hobetzeko aukera ematen du, seguruagoa eta autonomoagoa izan dadin ", azaldu du David Cantero Teknikerreko ikertzaileak.

Lortutako datuek balio handiko informazioa dute, eta alarmak aktibatzeko erabil daiteke, adibidez, beste ibilgailu edo oinezko batzuen hurbiltasunaz ohartarazteko, abiadura bidean baimendutakora egokitu beharraz informatzeko edo semaforoko argien egoera adierazteko.

Sistemarako zehaztutako autonomia-mailaren arabera, gidariak alarma-egoera horien berri eman diezaioke gidariari, edo modu eraginkorrean jardun dezake automobilaren aginteen gainean, aldez aurretik erantzuteko eta arrisku-egoerak saihesteko.

Zentro teknologikoaren soluzioak ikuspegi artifiziala eta deep learning ditu, eta ADAS sistemen efizientzia eta eraginkortasuna areagotzea du helburu. Teknikerrek funtzio anitzeko gainazaletan, nano-aditibazioan eta sistema optikoen integrazioan dituen gaitasunak jarri ditu, merkatuan paregabeak diren produktu integratuak hornitzeko.