Ikasleen jasangarritasunaren inguruko proposamenak Eibarko Eskola Agenda 2030eko osoko bilkuran

Eibarko Udaleko Ingurumen Sailak Eskola Agenda 2030 programaren barruko osoko bilkura hartu du, eta herriko ikastetxeetako ikasleek urtean zehar jasangarritasunaren arloan landutako proposamenak aurkeztu dituzte.

Ekimena ikasleen parte-hartzea sustatzeko eta ingurumenaren zein garapen jasangarriaren inguruko lanak udal ordezkariei helarazteko espazioa da.

Aurtengo ikasturtean, ikasleek ekoizpen eta kontsumo arduratsua izan dute aztergai. Horren harira, hainbat proposamen egin dituzte: garaiko produktuen kontsumoa sustatzeko kanpainak bultzatzea, arropa eta objektuen berrerabilpena indartzea, hondakinen prebentzioa hobetzea eta tokiko merkataritza sustatzea.

Halaber, herriko espazio publikoetan hobekuntzak proposatu dituzte, besteak beste zakarrontzien kudeaketa hobetzea, parkeak estaltzeko aukerak aztertzea eta ingurumenaren inguruko informazioa herritarrengana modu argiagoan helaraztea.

Udal ordezkariek ikasleen proposamenak jaso dituzte osoko bilkuran, eta horien inguruan erantzun eta azalpenak eman dituzte. Udalaren arabera, Eskola Agenda 2030 programak aukera ematen du ikasleen ekarpenak udal politiketan txertatzeko eta jasangarritasunaren arloko kontzientziazioa indartzeko.

Eskola Agenda 2030 programa Debegesarekin lankidetzan garatzen da Eibarren, eta urtero herriko ikastetxeek parte hartzen dute egitasmoan.