Urkizuko iturria konponduko dute, teknika espezializatuak erabiliz

Udalak kaltetutako pieza konponduko du teknika espezializatuak erabiliz, iturriaren osotasun historikoa zaintzeko. Lanak datozen asteetan egitea aurreikusten da, eta zenbait egunetan zehar egingo dira,  beharrezko material espezifikoen eskuragarritasunaren arabera. Esku-hartzea Udal Lantaldeak egingo du, Hirigintza eta Zerbitzu sailetako teknikoekin lankidetzan. Ego-Ibarra Batzordeak prozesua gainbegiratuko du, iturriaren jatorrizko izaera errespetatzen dela bermatzeko.

 

Joan den abenduaren 20an Urkizuko iturriak jatorri ezezaguneko kolpea jaso zuen, kalte handiak eragin zizkiona eskuineko aurrealdeko erlaitzaren erremate-piezari. Bizilagunen esku-hartze azkarrari esker, Udal Lantaldeak kaltetutako piezaren zatiak jaso zituen ezbeharra gertatu eta berehala. Ondoren, udal-teknikariek lekua aztertu zuten eta egiaztatu zuten zatiak egoera onean zeudela, zaharberritze-lanetan erabiltzeko moduan. Hori horrela, erabaki da piezak leheneratzea, eta baztertu egin da erlaitza guztiz ordeztea.

 

Teknika espezializatuak

Lan hauek teknika espezializatuen bidez egingo dira, esku-hartzearen iraunkortasuna eta estetika-fideltasuna bermatze aldera. Besteak beste, beira-zuntza lotzeko hagaxkak erabiliko dira, oxidazio-arazoak saihesteko, eta kare-morteroak gatz-eraketa minimizatzeko; arazo hori ohikoa da zementuzko morteroak erabiltzen direnean. Integrazio kromatiko egokia lortzeko, kaltetutako piezen barruko zatiak birrindu egingo dira, akaberan erabiliko den harea fina lortzeko.

Iturria, XVIII. mendean hareharriz eraikia, barroko estiloko obra bat da, bere berezitasunarengatik eta balio historikoagatik nabarmentzen dena. Iturriaren diseinu arkitektonikoa oinplano angeluzuzeneko eraikin txiki bat da, kanoi-gangaz estalia, alde bakoitzean banku jarraitu bat eta iturria bera dituena, aurrealdeko hormatik irteten den tutu bakarrarekin. Kanpoko fatxada moldura lodiz apainduta dago. Moldura horiek bi floroi dituzte pilastren gainean, egitura edertzeaz gain, gangaren bultzada horizontalei kontraindarra egiten dietenak. Erdialdean, alboetan bolutak dituen armarri bat dago, apaingarri gisa; atzeko horma, berriz, erabat itsua da, eta erlaitz gisa funtzionatzen duen moldura batez eta mentsula handi batez apainduta dago.

"Garrantzi arkitektonikoaz gain, iturriak balio sinboliko eta kultural nabarmena du, eta Ignacio Zuloaga artista ezagunaren margolan batean ere irudikatu zen. Horrek indartu egiten du bertako ondare historikoaren barruan duen garrantzia, eta Euskal Herriko historia artistikoarekin lotzen du, haren kontserbazioaren beharra azpimarratuz", adierazi dute Udaletik