Aratosteetako play-back lehiaketa Errebal Plazan egingo da aurten

Otsailaren 19an, domeka, ospatuko da Aratosteetako Play Back lehiaketa. Pandemiaren ondorioz azkeneko urteetan online egin behar izan eta gero, kalera itzuliko da berriro  …eta kitto!-k antolatzen duen lehiaketa, eta Errebal Plazak hartuko du arratsaldeko 17:00etatik aurrera. Betiko moduan LH 5. eta 6. mailetako ikasleek hartu ahal izango dute parte, eta, horretarako, izena eman beharko da otsailaren 10a baino lehen. Parte-hartzeko baldintzak honako hauek dira: Taldeak, asko jota, sei lagunez osatuko dira; parte-hartzaileek mozorrotuta joan beharko dute; talde bakoitzak ikuskizun bakarrarekin hartuko du parte; aurkeztutako abestiak euskaraz izango dira; abestia MP3 formatoan grabatuko da eta emailez bidaliko izen-emate fitxarekin batera (eskoletan dituzte) honako helbide honetara: normalizazioa@etakitto.eus.

Sariei dagokienez, hiru izango dira guztira: interpretazio onenarena, koreografia onenarena eta mozorro onenarena. Hala ere, parte-hartzaile guztiek jasoko dute oparitxoa. Lehiaketa egunean parte-hartzaileek 16:30erako egon beharko dute Errebal Plazan eta bertan emango zaie parte-hartzearen txanda edo ordena. Ainara izango da arduraduna, berarengatik galdetu. Informazio gehiagorako aurrez aipatutako helbidera idatzi.