EAJ-PNVk eta PSE-EEk Arrateko txosnetan egindako pintadak salatu dituzte

Arrateko jaietan Eibarko EAJ-PNVren eta PSE-EEren txosnetan hainbat pintada agertu dira, eta bi alderdiek gertatutakoa salatu dute. EAJ-PNVk jakinarazi du bere txosnan «independentzia», «sozialismoa» eta «amnistia osoa» idatzi dituztela. PSE-EEren txosnan ere pintadak agertu dira.

EAJ-PNVk «irmotasun osoz» gaitzetsi ditu pintadak, eta adierazi du «Eibarko aniztasun politikoaren, askatasunaren eta bizikidetza demokratikoaren aurkako eraso zuzena» direla. Alberto de la Hoz Eibarko EAJ-PNVko bozeramailearen esanetan, «alderdi politiko baten espazioari ordezkatzen duenagatik eraso egiten zaionean, intolerantzia politikoaren adierazpen baten aurrean gaude».

Alderdi jeltzaleak gogorarazi du ez dela lehen aldia halako pintadak agertzen direna bere txosnan. 2024an, esaterako, «Guri baino garestiago irtengo zaizue» mezua agertu zen. EAJ-PNVk azpimarratu du kritika politikoa zilegi dela, baina ez du onargarritzat jo desadostasuna «intimidazio, bandalismo edo desberdin pentsatzen dutenen aurkako eraso» bihurtzea.

PSE-EEk ere gaitzetsi du bere txosnan gertatutakoa. José Ignacio Asensio Gipuzkoako PSE-EEko idazkari nagusiak «erabat» salatu du erasoa, eta adierazi du halako ekintzek «bizikidetzaren eta balio demokratikoen aurka» egiten dutela. «Urtero atera behar izaten dugu halako erasoak salatzera», azaldu du.

Asensioren arabera, askatasuna, aniztasuna, errespetua eta tolerantzia dira bizikidetzaren oinarriak. «Arrateko txosna sozialistan pertsona guztiek dute lekua, beren ideiak edozein direla ere, jaiak elkargune eta ez bazterketa-gune gisa ulertzen ditugulako», adierazi du. Horrez gain, «askatasuna bazterketaren eta intolerantziaren aurrean defendatzen» jarraituko dutela esan du.

Bi alderdiek elkartasuna adierazi diete beren txosnetan lan egiten duten pertsonei. EAJ-PNVk, gainera, gogorarazi du bere txosnak helburu solidarioa duela eta aurten bertan bildutako dirua Goi Argi elkartearen gizarte-lana laguntzera bideratuko dela.