Bihar Saskibaloiaren Jaia hartuko du Ipurua kiroldegiak
2023/05/19
eta kitto!
Urterokoari jarraituz, Eibar Saskibaloiak bere egun handia ospatuko du. Taldeetako jokalariez gain, klubeko arduradunek “familietakoak eta lagunak ere” gonbidatu dituzte. Goizeko 09:30ean hasiko dira ekitaldiak eta arratsaldeko 15:30ak arte iraungo dute eta, “jai-giroan mutgiltzeko, taberna eta musika ere egongo dira”. Gutxi gorabehera bitan banatu dituzte saioak: eguerdira arte egingo direnak eta hortik aurrerakoak.
Goizekoan trebetasunak (09:30-10:15), tiroa (10:30-11:15), partidua (11:30-12:00) eta janordua (12:00-12:30) eskainiko dituzte hainbat pistetan banatuta: behekoan eskola mailakoak arituko dira, berdean infantilak eta erdikoan kadeteak. Azken bietan, gainera, partiduetan gurasoek ere hartu ahal izango dute parte. 12:30etik 13:30era sariak banatuko dira eta argazkia aterako. Hortik aurrera juniorren eta seniorren ordua izango da, lehenengoak pista berdean eta bigarrenak erdikoan: bien kasuan hirukoekin hasiko dira (13:30-14:15) eta ondoren partidua jokatuko dute (14:30-15:00). Jarraian, 15:30ak arte, sariak banatu eta argazkia aterako dute.
