Agifesek ‘Zinema eta Buru Osasuna’ zineforum zikloaren saio bat eskainiko du Eibarren

Agifesek ‘Zinema eta Buru Osasuna’ zineforum zikloaren saio bat eskainiko du Eibarren, nahasmendu obsesibo-konpultsiboari eta antsietateari buruz

Elkartea saioak eskaintzen ari da Gipuzkoako udalerrietan zehar eta hurrengo ekitaldia maiatzaren 19an izango da, Coliseo Antzokian, 18:00etan.
 Proiekzioaren ondoren, filmaren mezuan sakontzeko solasaldia zuzenduko dute Agifeseko kideek.

Proiektatutako filma ‘A Real Pain’ izango da, bi lehengusuren bidaia kontatzen duen komedia dramatikoa. Poloniako kontzentrazio-esparruetan zehar dabiltzan bitartean, beren barne-gatazkei eta trauma pertsonalei aurre egingo diete. David (Jesse Eisenberg), nahasmendu obsesibo-konpultsiboa (TOC) eta antsietate orokorra duen mutikoaren eta bere lehengusuaren (Kieran Culkin) istorioa da. Azken horrek Bigarren Mailako Gizonezko Aktore Onenaren Oscar Saria eskuratu zuen azken edizioan.

Emanaldirako sarrera doakoa izango da, eta ikusleek pelikulaz eta proiekzioaren ondorengo solasaldiaz gozatu ahal izango dute, filmaren mezuan sakontzeko asmoz Agifeseko kideen eskutik. 

Buru osasun arazoa duten pertsonen eta senideen Gipuzkoako elkarteak lurraldeko eskualde guztietara iritsi nahi du saio hauekin, ahalik eta jende gehiagorengana gerturatu ahal izateko. Iaz, Andoainen, Arrasaten, Zumarragan, Donostian eta Irunen gauzatu ziren saioak. Egitasmoaren helburua da buru osasuneko arazoen ezagutza zabaltzea, baita buru nahasmendua duten pertsonen gizarteratzea sustatzea ere.

Kazetaritza sariak
Agifesek 2025eko Kazetaritza eta Buru Osasuna Sariak antolatu ditu. Lehiaketa honen xedea buru osasunaren inguruko kazetaritza- eta dibulgazio-lanak sustatzea eta saritzea da. Buru nahasmendua duten pertsonei buruzko informazioa ikuspegi arduratsu batetik ematen duten lanak azpimarratu nahi ditugu; gizarte-sentsibilizazioa sustatzen eta estigma gainditzen laguntzen duten horiek, hain zuzen ere.

Sari hauek hedabideetako profesionalei eskerrak emateko sortu dira, ahalmen handia baitute buru osasuneko arazoak naturalizatzeko eta pertsonen gizarteratzea bultzatzeko.