Arragueta kalea urriaren 15ean irekiko dute berriro
Arragueta kalea urriaren 15ean irekiko dute berriro trafikorako. Kalea berritzeko lanak egiten ari den enpresak epea luzatzeko eskatu dio Udalari, eta Jon Iraola alkateak atzo SER irratian egindako elkarrizketan azaldu zuenez, lanek hilabete eta erdi inguru gehiago iraungo dute.
Arragueta kalean asfaltoa berritu eta espaloiak zabaldu dituzte bi aldeetan. Lanek irauten duten bitartean, oinezkoek eragozpenak izango dituzte, eta trafikoak ere murrizketekin jarraituko du.
2027ko udal aurrekontuen inguruan
Iraolak, bestalde, 2027ko udal aurrekontuei buruz ere hitz egin zuen. Aurreko urteetako aurrekontuen ildo berari jarraituko diotela azaldu zuen, eta datorren urteko proiektuen artean Julian Etxeberria kalea urbanizatzea dagoela aurreratu zuen. Lan horiekin batera, kale horretako trafikoaren noranzkoa aldatuko dute.
Alkateak Ego Gain kaleko El Corte Inglés-en lokalek etorkizunean izan dezaketen erabileraz ere hitz egin zuen. Udalak lokal horiek eskuratu eta Armagintzaren Museoa handitu eta bertara eramateko asmoa du. Iraolaren arabera, laster izan daitezke horren inguruko albiste positiboak.
Azkenik, 2027ko udal hauteskundeei begira, Iraolak Eibarko PSE-EEren alkategai izateko prest dagoela adierazi zuen, alderdiak datozen hilabeteetan bere hautagaitza berretsiz gero.
