Bizikleta Eguna ospatuko du Eibarko Txirrindulari Elkarteak igandean

Eibarko Txirrindulari Elkarteak Bizikleta Eguna antolatu du datorren iganderako, irailaren 27rako. Denboraldiko lasterketen egutegia amaituta, elkarteak urteko azken bi ekitaldiak ditu orain begiz jota: Bizikleta Eguna eta azaroaren 21ean egingo duten Txistorra Eguna. Lehenengoarekin, adin guztietako herritarrak bizikletaren inguruan elkartu eta kirolaz eta lagunarteaz gozatzeko gonbita egin dute.

Egitaraua 9:30ean hasiko da, kostaldeko buelta egiteko asmoz Untzagatik abiatuko diren zikloturista eta mountain bike zaleen irteerarekin. 10:00etan, berriz, goizean egingo diren ekintzetan parte hartzeko, haur eta gaztetxoentzako izen-ematea zabalduko dute udaletxeko arkupeetan. Parte-hartzaileek dortsala jasoko dute, eta zenbaki hori erabiliko da jardunaldiaren amaieran egingo den opari-sarirako zozketan.

11:00etan, haur eta gaztetxoen martxa abiatuko da Untzagatik. Mekola kaletik bidegorrian barrena joango dira Amañaraino, eta bide beretik itzuliko dira Untzagara. 11:30ean, hiriko zirkuitua prestatuko dute Toribio Etxebarria, Zuloagas, Calbeton eta Untzaga kaleen artean, bi itzuli egiteko. Txikienek, bestalde, plazan jarriko duten zirkuitu berezian ibiltzeko aukera izango dute. 0 eta 8 urte bitarteko haurrentzat trizikloak eta motorrak erabiltzeko gunea ere prestatuko dute.

Antolatzaileen asmoa da kostaldeko buelta egin duten zikloturistak anbulatorioaren ingurura joatea, gainerako parte-hartzaileekin elkartu eta denak batera Untzagara heltzeko. Egitarauaren arabera, zikloturisten topagunea eta helmuga Apalategin izango da, 12:00etan.

Jardunaldiaren amaieran, helduentzat salda eta txorizoa prestatuko dituzte udaletxeko arkupeetan, eta 0 eta 12 urte bitarteko parte-hartzaileentzat opariak zozketatu eta banatuko dituzte.