Bost urteko kartzela-zigorra eta 156.000 eurotik gorako isuna ezarri dizkiete Eibarko marihuana-elkarte bateko bi arduraduni
Gipuzkoako Auzitegiak bost urteko kartzela-zigorra ezarri die Eibarko marihuana-elkarte bateko presidenteari eta diruzainari. Horrez gain, 156.488,07 euroko isuna ordaintzera zigortu du bakoitza. El Diario Vascok jakinarazi duenez, auzitegiaren arabera, lokalean marihuana eta haxixa saltzen zituzten, helburu terapeutikorik gabe.
Bi gizonei hiruna urteko kartzela-zigorra ezarri dizkiete osasun publikoaren aurkako delituagatik, eta bina urtekoa legez kanpoko elkartze-delituagatik. Isunaren zatirik handiena lehen delituari dagokio: 153.568,07 euro ordaindu beharko ditu bakoitzak; beste 2.920 euro, berriz, bigarrenagatik.
Elkartea 2013an sortu zuten bi lagunek. 2017an, ordea, kudeaketa egungo presidenteari eta diruzainari utzi zieten. Auzitegiak sortzaileak absolbitu ditu, ordutik aurrerako jardueraren berri ez zutela ondorioztatu duelako. Epaiketa ekainaren amaieran egin zuten. El Diario Vascoren arabera, auzian bosgarren pertsona bat ere ageri zen, baina ez dute epaitu.
Poliziaren ikerketa eta 2020ko operazioa
Polizia Nazionalak 2020an hasi zuen elkartearen jarduera ikertzen, eta lokalaren inguruan zaintza lanak egin zituen. El Diario Vascok argitaratutakoaren arabera, abuztuko arratsalde batean 19 lagun sartu ziren lokalean 67 minutuko tartean, eta handik minutu gutxira atera ziren. Agenteen susmoak piztu zituen joan-etorri azkar horrek. Gainera, hainbat laguni marihuana edo haxixa zeramaten poltsatxoak aurkitu zizkieten; haietako batek galtzerdi barruan zeraman ezkutatuta.
Irailaren 23an, Polizia Nazionalak lokala miatu eta 34 kilo marihuana eta 110 gramo haxix atzeman zituen. NAIZek 2020ko irailaren 25ean argitaratutakoaren arabera, hiru pertsona atxilotu zituzten operazio hartan: elkarteko presidentea, idazkaria eta jendaurreko arreta egiten zuen langilea. Europa Press agentziak, Gobernuaren Ordezkaritzaren informazioa jasota, 685 euro eta doitasun-balantza bat ere atzeman zituztela jakinarazi zuen.
Auzitegiaren ebazpenak atzemandako droga eta baskula konfiskatzea eta elkartea desegitea ere agintzen du.