Datozen asteetan hasiko dira Mekola eta San Juan arteko pasealekua berrurbanizatzeko lanak
Eibarko Udalak Mekola eta San Juan arteko pasealekuaren berrurbanizazio-lanak abiarazteko azken prestaketetan dihardu. Proiektua Estudios y Obras Rekalde SL enpresari adjudikatu diote, eta lanek 433.269,19 euroko aurrekontua izango dute.
Jarduketa trenbidearen gainean egingo denez, Udala Euskotrenekin ari da beharrezko baimenak izapidetzen. Administrazio-izapideak aurreikusitako epeetan amaitzen badira, obrak datozen asteetan hasiko dira, azken tramiteak formalizatu ondoren.
Proiektuaren barruan, pasealekuko zoladura osorik berritzea aurreikusten da, irisgarritasuna hobetzearekin batera. Halaber, hiri-altzariak aldatuko dituzte eta lurpeko azpiegiturak eguneratuko dira, saneamendua, hornidura-sarea eta euri-uren drainatzea barne. Jarduketak hiriko hainbat auzo lotzen dituen pasealekuaren funtzionaltasuna, segurtasuna eta kalitate estetikoa hobetzea du helburu.
Udalak jakinarazi duenez, aurreikusitako lanez gain, jardinerak, bankuak eta paperontzi berriak jarriko dituzte, baita atarietarako sarbide-mailak mantendu ere, lanek irauten duten bitartean “auzotarren erosotasuna eta eremuaren eguneroko jarduera babesteko”.
