Eibarko EAJ-PNVk haurreskolen egoerari buruzko “gezurrezko baieztapenak” zabaltzea egotzi dio EH Bilduri
Eibarko EAJ-PNVk haurreskolen egoerak eragindako familien aldarrikapenak babestu ditu, eta EH Bilduri eskatu dio gai horren inguruan “gezurrezko baieztapenik” ez zabaltzeko.
Jeltzaleek azaldu dutenez, EH Bilduren azken adierazpenek ez dute errealitatea islatzen. Zehazki, ukatu dute 2024an LAB sindikatuak haurreskoletako plazak handitzeko aurkeztutako mozioaren aurka bozkatu izana. Haien arabera, proposamen hori ez zen bozkatu ere egin, mahai gainean uztea erabaki baitzen Bozeramaileen Batzordean, talde guztien adostasunarekin.
Gainera, EAJ-PNVk adierazi duenez, gerora, oposizioan zegoela, mozioa berriro lantzea eskatu zuen osoko bilkurara eramateko, baina PSE-EEk eta EH Bilduk ez zuten babestu, “bazekitelako Eusko Jaurlaritzak egin beharreko lanak egin zituela eta Udalari zegokiola berea egitea”. Hori dela eta, “erabat faltsutzat” jo dute erabaki horren ardura euren gain jartzea.
Bestalde, jeltzaleek salatu dute ez dutela parte hartu haurreskolen inguruko lokalen esleipenean, ezta espazio berrien plangintzan ere, eta ez dutela informaziorik edo gonbidapenik jaso gai horren inguruko bileretan.
EAJ-PNVren ustez, haurreskolen egoera ez da behar bezala kudeatu, eta “plangintza ez dela egokia izan” adierazi dute. Ondorioz, gaur egun plaza falta dagoela nabarmendu dute, eta horrek hainbat familia egoera zailean utzi dituela ohartarazi dute, seme-alabentzat plazarik gabe. Egoera horren aurrean, akatsak egon direla onartu eta autokritika egiteko beharra azpimarratu dute.
Era berean, EH Bilduren jarrera kritikatu dute, euren ustez arazoa politizatu eta “zarata sortzera” mugatu delako, konponbide edo alternatibarik proposatu gabe.
Azkenik, jeltzaleek adierazi dute une honetan lehentasuna dela plaza faltari erantzutea eta familiei irtenbideak ematea. Horretarako, erantzukizunez jokatzeko eta informazio “okerra” ez zabaltzeko eskatu diote EH Bilduri, eta euren aldetik lanean jarraituko dutela adierazi dute, egoerak kaltetutako familiei ahalik eta erantzun egokiena emateko.
