Eibarko HAPO berria idazteko lizitazioa onartu du Udalak
Eibarko Udalak Hiri Antolamendurako Plan Orokor (HAPO) berria idazteko lizitazioa onartu du, indarrean dagoen plangintza berrikusteko eta datozen hamarkadetarako hiri-eredua definitzeko. Udalak azaldu duenez, azken urteetan egindako lana eta, bereziki, Aurrerapen Dokumentua hartuko dituzte abiapuntu; bertan Eibarren etorkizuneko hirigintza-garapenerako helburu, irizpide eta alternatiba nagusiak jasotzen dira.
Udalaren arabera, plangintza berriak lehendik dagoen hiria berroneratzeari emango dio lehentasuna, hiriaren hazkunde hedakorraren ordez. Horretarako, dagoeneko finkatuta dauden hiri-espazioak hobeto aprobetxatzea, eremu degradatuak berreskuratzea eta zaharkituta edo erabiltzen ez diren lur eta eraikinei erabilera berriak ematea planteatzen du Aurrerapen Dokumentuak.
Ildo horretan, erabiltzen ez diren industria-eremu zaharrak berreskuratzea aurreikusten du Udalak, besteak beste, Lapeyra, AIBE eta Bittor Sarasketa. Azaldu dutenez, espazio horiek etxebizitzak, ekipamenduak edo jarduera ekonomiko berriak garatzeko baliatu nahi dituzte.
«Eibarrek barrutik hazten jarraitu behar du. Gure historiaren parte diren espazio industrialak ditugu, eta aukera bat izan daitezkeenak etxebizitza, ekipamenduak eta jarduera ekonomikoa sortzeko», azaldu du Jon Iraola alkateak. Haren esanetan, HAPO berriak espazio horiek eraldatzen lagundu beharko du, «hiri hobea, irisgarriagoa eta jasangarriagoa» lortzeko.
Etxebizitza eta auzoak
Udalak azaldu duenez, etxebizitza izango da plangintzaren beste ardatz nagusietako bat. HAPO berriak etxebizitza publikoa eta babestua sortzea sustatu beharko du, bereziki gazteei zuzendutakoa, eta horretarako dagoeneko urbanizatuta dauden espazioak aprobetxatzea planteatzen du.
Luis Vicente Castellanos Hirigintza zinegotziaren arabera, «Eibarko errealitatea aldatu egin da», eta gaur egungo eta datozen urteetako beharrei erantzungo dien plangintza eguneratua behar da. Etxebizitzaz gain, auzoak hobetzea eta degradatuta dauden espazioak berreskuratzea ere lehentasunen artean daudela azaldu du.
Udalak adierazi duenez, urteak daramatza industria-eremu zaharrak berreskuratzeko eta eraldatzeko lanean, eta HAPO berriak lan horri jarraipena eman nahi dio. Castellanosen hitzetan, «ikuspegi orokor bat ezarri» nahi dute, dagoen hiri-lurzorua hobeto aprobetxatzeko eta Eibarrek lur berriak kontsumitzeko beharrik ez izateko.
Irisgarritasuna eta mugikortasuna
Aurrerapen Dokumentuaren arabera, hiri-eredu berriak eguneroko joan-etorrietarako hiri erosoagoa lortzea ere izango du helburu. Horretarako, oinez eta bizikletaz ibiltzea sustatzea, auzoen arteko loturak hobetzea eta irisgarritasun unibertsala indartzea proposatzen du.
Udalaren arabera, Eibarko orografia konplexuak zaildu egiten ditu irisgarritasuna eta auzoen arteko loturak. Horren aurrean, etorkizuneko plangintzak egungo oztopoak murrizteko eta udalerriko guneen arteko loturak errazteko jarduketak jaso beharko ditu.
Era berean, Udalak azaldu duenez, Aurrerapen Dokumentuak berdeguneak eta bizikidetza-guneak sortzeko eta hobetzeko, degradatutako inguruneak lehengoratzeko eta Eibar klima-aldaketaren eraginetara egokitzeko neurriak ere jasotzen ditu.
«Hirigintzak pertsonen zerbitzura egon behar du, eta lagungarria izan behar da herritik ibiltzea, bertan bizitzea eta gozatzea gero eta errazagoa izan dadin», adierazi du Iraolak.
Beste hainbat irizpide
Udalak azaldu duenez, HAPO berriak gaur egungo hirigintza-plangintzan kontuan hartu beharreko beste hainbat gai ere jaso beharko ditu, hala nola genero-ikuspegia, hizkuntza-inpaktuaren ebaluazioa, hiri-osasuna eta ingurumenaren babesa.
Udalaren arabera, HAPOa ez da eraikinak eta lurzorua antolatzeko tresna hutsa izango; Eibarren etorkizunerako estrategia orokorra ere zehaztuko du.
«HAPOa ez da dokumentu urbanistiko hutsa», adierazi du Castellanosek. «Tresna honi esker ordenatu eta koordinatu ahal izango ditugu Eibarren etorkizunari buruz hartuko ditugun erabaki asko: non eta nola sortu etxebizitza, nola hobetu auzoak, zer espazio berreskuratu behar ditugun, nola egin aurrera irisgarritasunean eta nola prestatu hiria aurrean ditugun ingurumen- eta gizarte-erronketarako».
Lizitazioaren onarpenarekin, HAPOaren berrikuspenaren fase berri bati ekingo diote. Udalaren arabera, hurrengo urratsa Aurrerapen Dokumentuan jasotako irizpide eta proposamenak plan berrian garatzea izango da, datozen hamarkadetarako Eibarko hiri-eredua zehazteko.
