Familien arteko Altxorraren bila antolatuko du aurten ere ...eta kitto!-k maiatzean

2025eko Familien arteko Altxorraren Bila maiatzaren 9an antolatuko du ...etakitto! Euskara Elkarteak. Aurten aldaketa dago parte-hartzaileen adinari dagokionez, izan ere, Haur Hezkuntzako 4. mailatik hasita Lehen Hezkuntzako 4. mailara arteko ikasleei eta haien familiei zuzenduta egongo da aurtengo edizioa. Taldeka eman beharko da izena eta taldeak, asko jota,10 kidekoak izango dira. Taldekideak familia berekoak edo kuadrillakoak edo lagunak izan daitezke, baina bi-lau heldu egon beharko dira talde bakoitzean. Ezinbestekoa izango da gutxienez helduetako batek ahozko zein idatzizko euskara ulertzea.

Hasierak ere aldaketa izango du, Untzagan hasi beharrean Errebalen hasiko da-eta, hori bai, ohiko orduan, 17:15ean. Bertan jasoko dute taldeek lehenengo pista eta, hortik aurrera, asmatzen joan ahala pista berriak jasoko dituzte helmugara iritsi arte. Amaieran sariak egongo dira parte-hartzaile guztientzat. 

Izen-ematea datorren barixakuan, apirilak 11, zabalduko da eta maiatzaren 5era arte luzatuko. Horretarako, www.etakitto.eus webguneko inprimaki hau bete, 943200918 telefonora deitu edo elkartea@etakitto-eus-era mezua idatzi daiteke.