Gaur palako partidua eta bihar eskuz pilotako sei hartuko ditu Astelenak
Klub Deportiboko pilotariek jardunaldi betea izango dute aste honetan. Hasteko, gaur 20:30etik aurrera Gipuzkoako Gomazko Paleta Txapelketako buruz burukoa jokatuko da 7 koadroaren barruan, Gisasola eibartarra eta Astigarragako Luluaga protagonista direla.
Biharko jaialdia ez da makala izango, guztira sei partidu izango baititu, 17:45etik aurrera. Lehendabizi, Gipuzkoako Txapelketako Eskuz Binakakoan, lehen faseko azken jardunaldiari dagozkion partiduak ikusi ahal izango dira Errendimenduko gaztetxoen artean: infantiletan, Eibarko Colmenero-Agote eta Antzuolako Insausti-Iturbe izango dira lehian; ondoren, alebinetan, etxeko Arrieta-Uskola bikoteak Lasarteko Gorostidi-Jauregi izango du aurrez aurre.
Jarraian, Udaberri Torneoko bosgarren jardunaldiko lau norgehiagoka jokatuko dira: kadeteetan, euren multzoko bigarren den Eibarko Amillategi-Del Rey bikoteak Tolosako Gabarain-Garciaren kontra egingo du; jubeniletan, etxeko Amuategi-Azpilikueta eta Beasaingo Aranburu-Sanchez izango dira nor baino nor. Eta senior mailako bi partidukin itxiko da jaialdia, bietan puntu interesgarriak jokoan izango direla: Narvaiza-Agirresarobe bikoteak Alegiko Irurrioz-Oiarbide izango du aurkari, eta Ibarra-Condek Legazpiko Aguirre-Perez.
