Harrera beroa egin diote eibartarrek 31. San Andres Bertso Jaialdian aritu den boskoteari
…eta kitto! Euskara Elkartearen eskutik, Alaia Martin, Eneritz Artetxe, Joanes Illarregi, Sustrai Colina eta Unai Iturriaga bertsolariek jardun dute gaur iluntzean Coliseoko oholtza gainean, Mikel Arrillaga gai-jartzaileak ipini dizkien lanak ondo baino hobeto betetzen.
Ohikoa den bezala, jaialdia hasi aurretik aurtengo San Andres Bertso Paper lehiaketako irabazleei sariak banatu dizkie Ekaitz Juaristi Olaizola euskara elkarteko presidenteak, eta lau saridunek bertso irabazleak kantatu dituzte jendearen aurrean. 16 urtetik gorakoen artean Hernaniko Iñigo Legorburu izan da irabazlea (300 euro eta txapela) eta bigarrena Aimar Goenaga eibartarra (250 euro eta plaka). Gaztetxoen artean Juan Antonio Mogel ikastolako bi ikaslek bereganatu dituzte sariak, Luke Litagok lehena eta Peru Gorosabelek bigarrena.
