Ikasleen ametsetako jolastokien maketak erakutsiko dituzte gaurtik aurrera Topalekuan Juan Antonio Mogel ikastolakoek

Juan Antonio Mogel ikastolak “Jolastokien eraldaketan murgilduta” izeneko erakusketa zabalduko du gaur arratsaldean Topalekuan. Ekainaren 4tik 12ra bitartean egongo da ikustera joateko aukera, 18:00etatik 20:00etara (bihar eta etzi, arratsaldez zabaltzeaz gain eguerdian ere irekiko dituzte ateak, 12:00etatik 14:00etara).

Ikastetxetik azaldu dutenez, “irailean hasi genuen ibilbidetxo hau. Ikasturte hasieran haurrak xaxatu genituen eta beraien ametsetako jolastokia irudikatu zezaten eskatu genien. Banan-banan marrazkiak egin, beraien artean hitz egin, taldeka adostu eta ... azken finean, ametsak egia bihur zitezkeela sinestu. Helburua, gure jolastokiak poliki-poliki eraldatzen joatea da”.

Eskolako ikasle guztiak, 1. mailatik 6. mailara bitartekoak, plastikako irakasleen laguntzarekin, “proiektu txiki-erraldoi” honetan murgilduta ibili dira eta orain egindako lanaren emaitza erakusteko garaia da. Arreko astean eskolan egin zuten bezala, gaurtik aurrera Topalekuan egongo dira ikusgai ikasleen lanak: “Herriari zuzendutako erakusketa izango da eta denak zaudete gonbidatuta ikasleek egin dituzten artelanak ikustera joan eta horietaz gozatzera”.