Jesus Eguigurenek Memorias políticas liburua aurkeztuko du Portalean
Jesus Eguigurenek, 2002tik 2014ra bitartean PSE-EEko lehendakari izan zenak, 'Memorias políticas' izeneko liburua aurkeztuko du urtarrilaren 22an, ostegunean, 18:30ean, Portalean. Ekitaldia irekia izango da, eta Eibarko PSE-EEren ekimenez antolatu da.
Lan honetan, Eguigurenek lehen pertsonan bizi izan dituen gertakari politiko garrantzitsuen inguruko oroitzapenak eta gogoetak bildu ditu; trantsizio demokratikotik hasi eta bake prozesuraino.
Jesus Eguiguren euskal politika garaikideko figura garrantzitsuenetako bat izan da, bereziki ETAk bere jardun armatuari amaiera emango zion elkarrizketa-prozesuan izan zuen inplikazio zuzenagatik. ‘Memorias políticas’ lanean, egileak bakerako giltzarri izan zen garai bateko ikuspegi pertsonala eskaintzen du.
Eibarko alkate eta herriko PSE-EEko idazkari nagusiak, Jon Iraolak, argitalpenaren eta aurkezpen-ekitaldiaren garrantzia azpimarratu du: “Liburu ausarta da, gure historia hurbileko une oso konplexuen inguruko ikuspegi pertsonal eta zintzoa eskaintzen duena”. Halaber, Iraolak nabarmendu du Eguiguren funtsezko figura izan dela bakearen eraikuntzan, eta haren testigantzak erakusten duela elkarrizketa, zaila izan arren, ezinbestekoa izan zela.
