Kalamua Judo Klubak emaitza gazi-gozoak lortu ditu Kantabriako Kopan

Kalamua Judo Klubeko lau judokek parte hartu zuten urriaren 3an eta 4an Santanderren jokatutako Kantabriako Kopan. Klubak adierazi duenez, esperientzia positiboa izan da beste behin ere, nahiz eta espero ziren emaitzak ez lortu.

Uxue Gutierrezek Infantil Promozio mailako emakumezkoen lehian hartu zuen parte. Lehen randorian aurpegian kolpe handia jaso zuen eta borroka galdu egin zuen, baina egoerari buelta ematea lortu zuen. Azkenean, bi garaipen eta bi porrotekin amaitu zuen bere ligako jardunaldia.

Aner Gonzalezek, bestalde, lehen borroka irabazi zuen Kadete mailako -55 kiloko kategorian, baina bigarren txandan galdu egin zuen. Bigarren aukeran, borroka irabazi egin zuen, baina hurrengoan galdu eta lehiaketatik kanpo geratu zen.

Kadete mailan ere, Julen Martinek (-66 kg) eta June Valladaresek (-63 kg) lehen txandan galdu zuten, eta ez zuten bigarren aukeran lehiatzeko aukerarik izan.

Kalamua Judo Klubak lanean jarraituko du hurrengo hitzorduari begira. Avilesko Kopa urriaren 24an eta 25ean jokatuko da.