‘La farsa de la transición ecológico-energética’ liburua aurkeztuko dute urriaren 5ean Coliseon

'La farsa de la transición ecológico-energética' liburua aurkeztuko dute urriaren 5ean Eibarren. Carlos Taibo, Antonio Aretxabala eta Antonio Turiel egileak Coliseo antzokian izango dira, 19:00etan, lana aurkezteko eta haren inguruko azalpenak emateko. Eibarko Baso Biziak eta Lumaltik Herriak elkarteek antolatu dute ekitaldia, eta sarrera doakoa izango da.

Liburuak egungo trantsizio ekologiko eta energetikoaren eredua kritikoki aztertzen du, eta zalantzan jartzen du energia berriztagarrien hedapenak egungo kontsumo-ereduari eusteko aukera emango ote duen. Egileen arabera, trantsizioaren atzean interes ekonomiko eta korporatiboak ere badaude, eta energia-ereduaren aldaketak ez du egungo sistema ekonomikoaren logika zalantzan jartzen.

Lanaren abiapuntua Euskal Herrian egindako hainbat mahai-inguru dira. Bertan, energia berriztagarriekin lotutako instalazioen hedapenaz eta horrek lurraldean eta gizartean izan ditzakeen ondorioez aritu ziren.

Baliabideen mugak

Hiru egileek gai horiek landu dituzte azken hilabeteetan egindako hitzaldietan ere. Naiz hedabideak jasotakoaren arabera, apirilean Iruñeko Txantrea auzoan egindako saioan baliabide energetikoen agortzea izan zuten hizpide, eta azaldu zuten, haien ustez, ez dela posible lehen ezagututako “normaltasunera” itzultzea.

Antonio Turielek petrolioaren eta gasaren ekoizpenaren bilakaerari eta horrek ekonomian izan ditzakeen ondorioei buruz hitz egin zuen. Antonio Aretxabalak, berriz, Euskal Herriko lurralde-antolaketaren eta energia-proiektuen inguruko hainbat kezka azaldu zituen. Carlos Taibok desazkundearen beharra defendatu zuen, baliabideak mugatuak diren planeta batean etengabeko hazkundea posible ez dela argudiatuta.

Naizek jaso zuenez, Taibok kontsumo-maila murriztea eta tokiko bizitza indartzea proposatu zuen, besteak beste, lana banatzea, azpiegitura berrien sorrera mugatzea eta kontsumoan oinarritutako aisialdiaren ordez beste eredu batzuk sustatzea.

Egileak

Antonio Aretxabala Geologian doktorea eta zientzia-dibulgatzailea da. Geoteknia eta hormigoiaren alorrean lan egin du Nafarroako eta Zaragozako unibertsitateetan, eta historiaren eta geologiaren arteko harremana aztertu du.

Antonio Turiel Fisikan eta Matematikan lizentziaduna eta Fisika Teorikoan doktorea da. Zientzia-dibulgatzaile gisa ere aritzen da, eta ikertzaile zientifikoa da Bartzelonako CSICeko Itsas Zientzien Institutuan.

Carlos Taibo, berriz, Zientzia Politikoko irakaslea izan da hogeita hamar urtez Madrilgo Unibertsitate Autonomoan. Desazkundearen ikuspegiari eta kolapsoaren teoriari buruzko hainbat libururen egilea da.