Lau proiektu berri batu dira HELDU! ekintzailetza-programaren 4. ediziora

Eibarko Udalak eta Debegesak laugarren urtez jarraian jarri dute martxan HELDU! ekintzailetza-programa, hasierako fasean dauden enpresa-ideiei laguntza eta bideratzea eskaintzeko helburuarekin.

Irailaren 3an egin zen inaugurazio-ekitaldian aukeratutako lau proiektuen sustatzaileak aurkeztu ziren, Udaleko eta Debegesako ordezkariekin batera. Jon Iraola alkateak ekimen honek ekintzaileekiko konpromisoa berresten duela azpimarratu zuen aurkezpenean: “Beharrezkoak diren tresnak eta laguntza eskaini nahi dizkiegu, haien ideiak enpresa sendo bihur daitezen”. Bestalde, Ekonomia Garapeneko zinegotzi Vanesa Hortasek gogorarazi zuen ekintzailetza dela “Eibarko etorkizun ekonomikoaren giltza”.

Honakoak dira 2025eko edizioan hautatutako proiektuak:

• Dronvista: ikus-entzunezkoak, ikuskapen teknikoak eta fotogrametriak egiteko dron bidezko zerbitzuak.
  
  

• Hortz-laborategia: protesi finkoan espezializatutako laborategia, teknologia digitala eta teknika tradizionalak uztartzen dituena.
  
  

• Neuro Blueprint SS: adimen artifizialarekin planoak bilatzeko softwarea.
  
  

• MyGamerz: gamer komunitateentzako aplikazio soziala.
  
  

Parte-hartzaileek euren ideiak Debegesako enpresa-inkubagailuan garatuko dituzte. Programak 100 orduko prestakuntza eta aholkularitza eskaintzen die (formazioa, tutoretza eta aholkularitza), negozio-eredua, estrategia, finantzaketa, marketina eta komunikazioa bezalako arloetan. Gainera, ekintzaileek metodologia berritzaileak, instalazioak, finantziazio-aukerak eta networking guneak izango dituzte eskura.

Ekintzaileen komunitatea indartzea eta proiektu berritzaileei bultzada ematea da HELDU! programaren xedea. Programa abenduan amaituko da, lortutako emaitzen aurkezpenarekin.