Lehen garaipena Ohorezko Erregionaleko CD Urki-rentzat

Denboraldi hasiera txarrari buelta eman dio Ohorezko Erregional mailan jokatzen duen CD Urki taldeak. Aurreko jardunaldian berdinketa lortu ondoren, lehen garaipena lortu du oraingoan Mikel Bilbaok entrenatzen duen taldeak. Eibartarrek Añorga KKE hartu zuten Unben eta 3-1 gailendu zitzaien.

Partida berehala jarri zitzaion alde Urkiri. Hugo Aldazabalek 2. minutuan sartu zuen gola eta Aner Zubizarretak 15. minutuan sartu zuen bigarrena. Hirugarrena Hugo Aldazabalek lortu zuen, atsedenaldira alde nabarmenarekin iritsiz.

Bigarren zatia lasaia izan zen eta Añorgak aldea murriztu zuen 71. minutuan, baina Urkik ondo eutsi zion markagailuari eta hiru puntuak etxean geratzea lortu zuen.

Garaipen horrekin, Urki sailkapeneko 10. postuan dago orain, 4 punturekin. Datorren jardunaldian, Beti Gazteri egingo dio bisita talde gorriak.