MAIALEN BILBAO: “Gauza berdinak idaztea norberari mugak jartzea da”

Suspensearen eta intrigaren bidetik eramango gaitu berriz ere Maialen Bilbao idazleak. ‘Martina’, ‘Escala de grises’ eta ‘Nieve roja en Helen’s Bay’ liburuen ostean, lan berria kaleratu du: ‘El Juego del Arlequín y otros cuentos’. Gainera, bere eskutik sortu ditu ipuin-sorta honi beste dimentsio bat ematen dioten ilustrazioak. Liburua Topalekun aurkeztuko du apirilaren 5ean.

Misterioa sortzen abila da Maialen Bilbao eta bere lanetan intrigazko munduak sortzen ditu. Aurrez aurreko tratuan, ostera, oso gozo eta irribarretsua da. Txikitatik izan du idazteko eta marrazteko zaletasuna, bere terapia dela diosku.

Zein da izenburuan aipatzen duzun Arlekinaren Joko hori?

Liburua antologia bat da, 30 ipuin batzen ditu. Izenburua ipuin horietako batetik hartu dut. Dena dela, beste alde batetik begiratuz, dirudienaren eta benetan denaren arteko dualtasun edo joko horretan ere kokatu daiteke. Irakurlearekin jolasteko modu bat da. Gauza bat pentsatu dezakezu eta azkenean ez da hori gertatzen. Horretan oinarritu naiz ipuinak kontatzeko orduan. Bestalde, estetikari begira, irudia polita da eta izenaren sonoritatea polita iruditzen zaitzaidan.

Irudi polita... eta beldurgarria!

Bai, izan daiteke! Azkenean, hori da asmoa. Ez beldurtzea, baina bai iluntasun eta suspense kutsu hori ematea.

Ipuin solteak dira ala elkarren arteko lotura dute?

Ipuin solteak dira. Ez dute elkarren arteko lotura zuzenik, baina denak daude testuinguru ilun edo makabro batean kokatuta. Ipuin bakoitzak bere istorioa eta unibertsoa ditu, baina denak dira ilunak, beldurrezkoak eta batzuk baita gogorrak ere.

Nola saiatzen zara irakurlea beldurtzen edo intriga sortzen?

Inspirazioa iturri askotatik lortzen dut. Eguneroko xehetasunetan sortu daitezke ideiak. Bestalde, genero horretako klasikoak irakurtzen ditut, pelikulak ikusi, kondairen inguruan ikertzen dut... Gainera, asko gustatzen zait autobusean edo metroan doan jendearen atzean egon daitekeen istoria asmatzea.

30 ipuin sortzeko irudimen asko beharko da ba!

Tira, hamar urteko tartean idatzi ditut liburuko ipuinak. Beraz, ipuin batzuek bost urte dituzte eta beste batzuek sei hilabete. Hautaketa-lana egitea eta ipuinen istorioak leuntzea eta dotoretzea izan da lanik mardulena.

Idazterako orduan nolako prozesua jarraitzen duzu?

Aurretik bi eleberri idatzi ditut eta lan honi aurre egiteko modua ezberdina izan da. Eleberri bat idatzi izan dudanean, hasi eta amaitu arteko prozesua izan da. Hau ezberdina izan da. Ipuinak hautatu behar izan ditut, baita idatzi edo zuzendu ere, baina gehiago izan da bateratze-lana egitea, zentzua ematea eta polita jartzea.

Asko kostatu zaizu hautaketa-lana egitea eta testuak egokitzea? Noiz ematen duzu amaitutzat prozesu hori?

Ezin daiteke esan (barreak). Liburua argitaratuta ere, idatzi dudan ipuin bat irakurriz gero, beti pentsatzen dut gauzak beste modu batean jarri nitzakeela. Bestela, oso prozesu polita izan da. Lehen aldia izan da horrelako proiektu bat egiten dudana, sekula ez dut antologiarik egin, baina ordua zela pentsatzen dut, asko nuelako idatzita. Kontakizun asko nituen. Beti gustatu izan zait idaztea eta marraztea, artea oro har, eta nituen gauzak ikusita liburu bat idazteko materiala nuela pentsatu nuen.

2016an argitaratu zenuen lehen liburua. Idazle moduan nolako eboluzioa izan duzula pentsatzen duzu?

Hamar urte dira lehen liburua idatzi nuenetik eta idazketan hobekuntza nabaritzen dela uste dut. Praktikak eta esperientziak asko laguntzen dute. Idazle moduan hazi egiten zara, bidean ikasi egiten duzu. Horrela ez balitz, kezkatu egingo nintzateke (barreak). Hobekuntzaz gain, ezberdintasun bat nabari dut. Ni neu ere ez naiz pertsona berdina, orain dela hamar urte beste pertsona bat nintzen, beste gauza batzuk idazten nituen. Beti gauza berdinak idaztea norberari mugak jartzea da.

Dena dela, zure estiloari jarraitzen diozu kontakizun ilun eta misteriotsuak eginez, ezta?

Bai bai, hori nirea da eta horrekin hilko naiz. Esan bezala, nik ere horrelako gauzak kontsumitzen ditut, baita fantasiazko gauzak ere. Horrelakoa naiz. Bakoitzak bere zaletasunak eta gustuak ditu.

Liburu honetan zure ilustrazioak jarri dituzu. Nolakoak dira?

Azala kenduta, barruko irudi guztiak egin ditut. Kontakizun bakoitzaren aurkezpena egiteko marrazki txiki bat jarri dut. Ipuina irakurri ondoren marrazkiak berriz ikusiz gero, beste zentzu bat harrapatzen zaio. Ez da ezer aurreratzen, baina pistaren bat bai.

Liburua non erosi daiteke?

Nik nituenak agortu egin zaizkit, baina ‘Amazon’ eta ‘Elkar’-en webguneetan eskuratu daitezke, eta laster ‘La Casa del Libro’-n.