Musika eskolako EKOS helduen koru berriak kontzertua emango du zapatuan Karmen elizan, Debabarreneko Orfeoiarekin batera

Datorren zapatuan EKOS abesbatzaren aurkezpena egingo dute Karmengo elizan, 20:15ean, egingo den kontzertuan. Eibarko Musika Eskolako helduen abesbatza da EKOS, eta eurekin batera Debabarreneko Orfeoia egongo da. Jose Miguel Laskurain Orfeoiko zuzendariak gidatuko du kontzertua, eta berak eman dizkigu ekitaldiaren inguruako hainbat xehetasun: "Gauden datagatik, Aste Santuaren aurretik musika sakratuko kontzertu bat egin nahi izan dugu, baina hainbat berezitasunekin; pieza gehienak gaur egungo musika sakrokoak dira, gaur egungo musika eta harmoniakoak, eta ziur nago harrigarriak direla eta mundu guztiari gustatzen zaizkiola. Ez da beharrezkoa musika sakratu klasikoaren maitale izatea mundu guztiari seguru gustatuko zaion esperientziaz gozatzeko".

Kontzertua hiru zatitan banatuko da. Lehenik eta behin Debabarrena Orfeoia arituko da, telonero lanak eginez eta EKOS abesbatza berriari ongietorria emanez. Ondoren EKOS abesbatzak abestuko du, eta azkenik bi abesbatzak elkarrekin abesten arituko dira. "Une zoragarria" zango dela dio Laskurainek. Musika duten abestiak izango dira eta beste batzuk a capella, kontzertua atseginagoa eginez. Kontzertuak ordubeteko iraupena izango du, eta "herritar guztiak daude gonbidatuta".