Sagardo Egunak arratsaldeko 19:00etatik aurrera jarraituko du

Azkenean eguraldia portatu egin zaigu eta, bustitzen ibili barik, ederto ospatu da Sagardo Egunaren lehen zatia Untzagan. Eguerdian hasi eta bazkaltzeko ordua ailegatu bitartean jendetza ibili Gorenak-en sagardo ezberdinak probatzen eta pintxoak jaten. Umeendako jolasak, soinujoleak, txalapartariak, dolarea, kirikoketa, sagar-dastaketa... denetarik izan da. ...eta kitto! Euskara Elkartearen eskutik urtero egiten den sagardoaren inguruko jaia arratsaldean izango da bueltan, bazkaltzeko etenaldiaren ondoren.  19:00etan hasiko dira sagardoa banatzen eta pixka bat aurretik zabalduko da tiketen salmentarako mahaia.