Sindikatuen arabera, hezkuntza publikoaren grebak jarraipen zabala izan du gaur ere, bere bederatzigarren egunean

Urtea hasi denetik bederatzigarren greba eguna da gaurkoa, eta sindikatuek deituta manifestazioak egin dira Bilbon, Donostian eta Gasteizen. Steilas, LAB, ELA eta CCOO sindikatuek deitu dute lanuztea eta, guztira, 27.000 irakasle zeuden grebara deituta. Sindikatuek emandako datuen arabera, grebaren jarraipena %75ekoa izan da. Hezkuntza Sailak, berriz, %48ra jaitsi du greba egin duten irakasleen kopurua.

Aurreko astelehenean bildu ziren azkenengoz sindikatuak eta Eusko, baina ordu luzez berbetan aritu eta gero, goizaldeko 01:00ean eman zuten amaitutzat bilera, akordiorik gabe. Gauzak horrela, sindikatuek ez dute baztertu greba gehiago deitzea, baina Eusko Jaurlaritzak “lasaitasuna” eskatu du, “lanuzteekin ez dutela negoziatuko” gaineratuta. Maria Ubarretxena Eusko Jaurlaritzaren bozeramaileak esan duenez, mobilizazioak amaitu arte itxarongo dute berriro ere negoziazioei heltzeko. Horren aurrean oso kritiko azaldu dira sindikatuak, eta greba desaktibatzeko azpijokoan aritzea leporatu diote Hezkuntza Sailari. Diotenez, gatazka bideratzeko proposamenik ez diete oraindik helarazi.