Toribio Echevarria Sarien 36. edizioak baditu 13 proiektu finalistak
Toribio Echevarria Sarien 36. edizioak baditu finalistak. Aurtengo deialdira 44 hautagaitza aurkeztu dira, eta epaimahaiak 13 proiektu aukeratu ditu bi kategoria nagusietan: bederatzi «Startupak eta Enpresa Proiektuak» kategorian, eta lau «Enpresa Berritzailea» kategorian.
Lehen kategorian, Pribait, Furantek, Reconnect, TrebezIA, BATTIA Recycling Technologies, Noraka, RaceStory, Gladiatrix eta Bihar Batteries aukeratu dituzte finalistatzat. Bigarren kategorian, berriz, Neety Technologies, Inspectrail, Respira Miramon eta Natural Active Wear dira hautagaiak.
Horiez gain, hiru proiektu «Eibarko Enpresa Saria – Made in Eibar» sarirako ere hautagai dira: BATTIA Recycling Technologies, Noraka eta RaceStory.
12.000 euroko sariak
Bi kategoria nagusietako irabazle bakoitzak 12.000 euro jasoko ditu. Diru-sariaz gain, proiektuak garatzeko eta hazteko laguntza-programak eta baliabideak izango dituzte eskura; besteak beste, finantzaketa, aholkularitza eta prestakuntza.
«Eibarko Enpresa Saria – Made in Eibar» kategoriako irabazleak ere 12.000 euro jasoko ditu, eta, horrez gain, 10.000 eurorainoko bono teknologikoa izango du produktuak, prototipoak eta patenteak garatzeko. Bonoa, ahal dela, Teknikerrekin edo BRTA sareko beste zentro teknologikoren batekin elkarlanean erabiltzeko da.
Irabazleak azaroaren 5ean jakinaraziko dituzte, Teknikerren egingo den sari-banaketa ekitaldian. Ekitaldian, «Iñaki Goenaga» aitorpena ere emango diote Eibarko enpresa bati, haren ibilbidea, konpromisoa eta herriko garapen ekonomikoari egindako ekarpena aitortzeko.
Gipuzkoaren etorkizunari buruzko solasaldia
Sari-banaketa ekitaldian, «2040: Odissea bat Gipuzkoan. Zientzia, adimena eta gizatasuna: eraiki nahi dugun etorkizuna» izeneko solasaldia ere egingo dute. Miguel Ángel Carrera AVS enpresaren sortzaile eta zuzendari nagusiak eta Román Orús Multiverse Computing enpresaren sortzaileetako batek hartuko dute parte. Koldo Peciña Gipuzkoako Foru Aldundiko Proiektu Estrategikoetako zuzendari nagusiak gidatuko du solasaldia.
Eibarko Udalak eta BIC Gipuzkoak antolatzen dituzte Toribio Echevarria Sariak, ekintzailetza berritzailea eta enpresa-proiektu berrien garapena sustatzeko.
