Udalak oso positibotzat jo ditu 2026ko San Juan jaiak
Eibarko Udalak oso positibotzat jo du aurtengo San Juan jaien edizioa. Ia hilabetez luzatu den egitarauak milaka herritar elkartu ditu kale eta plazetan, eta Udalaren arabera, jaiak giro onean eta normaltasunez igaro dira, bero-boladak eragindako moldaketak gorabehera.
Jaien unerik jendetsuena ekainaren 20a izan zen, Leire Martinezen kontzertua eta ondorengo DJ emanaldian, bereziki. Kultura Sailaren arabera, 10.000 lagun inguru bildu zituzten bi emanaldiek.
Udalak adierazi duenez, egitarauak askotariko eskaintza izan du aurten ere: haur eta gazteentzako jarduerak, kirol-probak, kultur emanaldiak eta ohiko hitzordu tradizionalak izan dira, besteak beste. Era berean, nabarmendu du proposamen guztiek harrera ona izan dutela herritarren aldetik, eta jai eredua indartzen jarraitzen duela aniztasun horrek.
Tokiko sortzaileek egitarauan izan duten tartea nabarmendu du Udalak. EMEKAk bere lana taularatu zuen, eta Danel Santiagok eman zion amaiera ekainaren 20ko gaualdiari. Udalaren arabera, herriko talentuari ikusgarritasuna ematea izan da aurtengo edizioaren apustuetako bat.
Hala ere, jaiak ez dira aurreikusitako moduan garatu. Ekainaren 23an eta 24an ezarritako bero-boladaren alerta gorriak egitaraua egokitzera behartu zuen udala, eta hainbat jarduera bertan behera utzi edo moldatu behar izan ziren. Hala ere, iluntzetik aurrera jarduera gehienak normaltasunez egin ziren.
Jon Iraolak nabarmendu du herritarren jarrera funtsezkoa izan dela jaien arrakastarako: parte-hartzea “apartekoa” izan dela eta eibartarrek berriz ere erakutsi dutela jaiak ilusioz eta erantzukizunez bizitzen dituztela.
Balorazio positibo horren ostean, Udalak jakinarazi du datorren urteko San Juan jaien prestaketa lanak hasi direla dagoeneko, helburua izanik jai “parte-hartzaile, seguru eta anitzak sendotzen jarraitzea”.
