Usartza Txistulari Taldeak kontzertua eskainiko du domekan Untzagan

Txistulari Bandak 90 urte beteko ditu aurten, eta merezi duen ilusioarekin ospatzeko asmoa dutela aurreratu dute.
Usartza Txistulari Taldeak kontzertua eskainiko du domekan Untzagan
2025/04/01 17:32
eta kitto!

Usartza Txistulari Taldeak kontzertua eskainiko du domekan, apirilak 6, Udaltxeko arkupeetan, 12:45etik aurrera. izaera eta estilo anitzeko egitaraua prestatu dute:

- ATIARNO (fandangoa eta arin arina) - P. Onraita
- SOKA DANTZA - J.I. Ansorena
- DOINUA ETA BARIAZIOAK - W. A. Mozart
- "AMAYA" OPERAren  EZPATA DANTZA - J. Guridi
- AGUSTIN, XANTIN ta JUAN JOXE (Rapsodia) - I. Ansorena

Domeka honetako kontzertuan, txistuaren doinuak entzuteaz gain, txistulari taldearen 90. urteurrenaren harira izango diren hurrengo emanaldiak emango dituzte ezagutzera. Usartzakoen esanetan, "duela 15 urte, 2010ean, kontzertu eta emanaldi bereziekin ospatu genuen 75. urteurrena, lehen txistulari banda hark lehenengo kontzertuan jo zituzten obrak interpretatuz. 75. urteurren horretatik aurrera, beste 15 urte bete ditugu emanaldiekin, eta Musika Eskolaren eta Udalaren laguntza izan arren, ez da erraza txistulari berriak erakartzea, urteek aurrera egin ahala, gure hirian errotuta dagoen tradizioa ez galtzeko. Aurten ere merezi duen ilusioarekin ospatu behar dugu 90. urteurren hau".

Iraganari begirada
Txistuak gure herrian izan duen ibilbideari errepasoa egin diote Usartzakoek. "1566. urtean Anton de Ybarra lehen danbolinaren erreferentzia dugu; orduan instrumentista bakar batek txistua eta danbolina jotzen zituen. Gerora, 1935eko urteen poderioz, Eibarko lehen txistulari banda sortu zen, gaur egun ezagutzen dugun bezala. Lehenengo banda Leon Laspiur (1go txistua), Florencio Ansola eta Lucio Bengoa (2. txistua 2), Sabino Barrenetxea (silbotea) eta Pedro Alberdik (danborra) osatu zuten.
 
Gaur egun, baja batzuen ondoren eta taldeko zuzendari zen Elena Perezen heriotza goiztiarraren ondoren, Usartza Txistulari Taldea honako hauek osatzen dute: Enrique Montero (zuzendaria eta 1. txistua), Iratxe Gimenez eta Leire Arrizabalaga (2. txistua), Xabier Zorrakin eta Asier Castelos (silbotea), German Ereña (danborra) eta Iñaki Orbegozo (danborra, xilomarimba eta tronpa).



Albiste erlazionatuak

Musika eskolako EKOS helduen koru berriak kontzertua emango du zapatuan Karmen elizan, Debabarreneko Orfeoiarekin batera

Musika eskolako EKOS helduen koru berriak kontzertua emango du zapatuan Karmen elizan, Debabarreneko Orfeoiarekin batera

2025/04/02
Martxan da Eibarko Artisten Elkartearen erakusketa kolektiboa

Martxan da Eibarko Artisten Elkartearen erakusketa kolektiboa

2025/04/02
Virginia Imazek helduentzat ipuinak kontatuko ditu gaur Eibarko liburutegian

Virginia Imazek helduentzat ipuinak kontatuko ditu gaur Eibarko liburutegian

2025/04/02