Eibarko hitanoa modu ludikoan ikasteko atala gehitu diote Appa hi! aplikazioari

Eibarko hitanoa modu ludikoan ikasi nahi dutenentzat Appa hi! aplikazioan sortu duten atal berria aurkeztu dute gaur Eibarren AKEBAIko Ane Albisuk, Badihardugu elkarteko Asier Sarasuak eta Jon Iraola alkateak. Azaldu dutenez, “garai batean hika kalean eta etxean hitz egiten ikasten zen, baina gaur egun transmisio hori etenda dago Eibarren, eta etxean eta lagun artean hizkera mota hori berez jaso ez dutenei erreminta bat eskaini nahi die Eibarren Akebaik, Egoibarra eta Eibarko Udalarekin batera”. Aplikazioaren edukia Badihardugu elkarteak sortu du, eta Eibarko hitanoa ikasteko atala gehitu diote orain arte egindakoari.

Mugikorrean erabiltzeko garatu duten doako aplikazioa dagoeneko eskuragarri dago, Google Play edo App Store bidez jaitsi eta instalatzeko moduan. Gure herriko hitanoa berreskuratzeko erreminta honek bost asteko ikasketa prozesu bat proposatzen du, baina jolas modura planteatuta. Izan ere, galdera-erantzun jolasa da berez, eta galderak ondo erantzuten joan ahala, aurrera egiten jarraitzeko aukera ematen dio erabiltzaileari. Asier Sarasuaren berbetan, “35 egunean hitanoaren funtsa ikasteko aukera ematen du, egunero pilula bat eginez. Pilula bakoitzean azalpenak, marrazkiak eta bideoak ageri dira, eta ondoren, azalpenekin lotutako galdera-sorta bat dator: partidak. Galdera guztiei zuzen erantzunez gero, hurrengo egunean beste pilula bat egiteko aukera irekitzen da. Bestela, partidak nahi beste aldiz errepikatu daitezke, ondo egin arte”. Astero errepaso bat proposatzen da App-aren bidez, eta maila bat igotzeko aukera. Guztira bost maila dira gainditu beharrekoak, aste bakoitzeko bat. Dena dela, bakoitzak bere erritmoari jarraitu diezaioke.