Eibarren Ingurumenaren Eguna ospatuko da, klima aldaketa eta energia ardatz hartuta

0    Gizartea 
ETA KITTO
Eibarren Ingurumenaren Eguna ospatuko da, klima aldaketa eta energia ardatz hartuta
ETA KITTO 2021, Eka 03

Ekainean zehar Ingurumen-Jardunaldiak eskainiko dira online formatuan. Eibarko Udaleko Ingurumen Sailak, datorren ekainaren 5ean ospatuko den Ingurumenaren Mundu Egunaren harira, Ingurumen Jardunaldien edizio berri bat egingo du. Oraingo honetan, Klima Aldaketaren eta Energiaren gaia jorratuko da, Udala udalerriko Klima Aldaketarako eta Energiarako Ekintza Plana (PACES) prestatzen ari dela aprobetxatuz.

Horrela, hainbat jarduera antolatu dira datozen egunetan zehar, horietako asko online. Alde batetik, gai horretan adituak diren pertsonei egindako hiru elkarrizketa eta hiru bideo labur jarriko dira Eibarko herritarren eskura, udaleko web orriko Ingurumena atalean eta Eibarko Udaleko Ingurumen Saileko Youtubeko kanal ofizialean. Ikus-entzunezko material hori ekaineko hurrengo hiru ostiraletan argitaratuko da (ekainaren 4,11 eta 18an).

Lehenengo elkarrizketa Elisa Sainz de Murieta BC3 – Basque for Climate Change ikertzaileari egin diote, eta klima aldaketak Euskal Herrian dituen ondorioez arituko dira. (Elisak Klima Aldaketari buruzko gazteON!eko podcasta entzuteko: klikatu hemen). Hurrengo bi elkarrizketetan, Eibarren energia berriztagarrien etorkizunaz (Aitor Urresti, UPV-EHUko energia berriztagarrien ataleko irakaslea) eta mugikortasun iraunkorraz eta ibilgailu elektrikoaz (Monica Díaz, Energiaren Euskal Erakundeko eraginkortasun energetikoaren eta garraioaren arloko teknikaria) arituko dira.

Bestalde, ekainaren 7an, 18: 00etatik 19: 30era, PACESen herritarren partaidetza-prozesuaren barruan, online partaidetza-saio bat egingo da (euskaraz). Saio horretan, egiten ari den lanaren berri emateaz gain, udalerriko klima-aldaketari eta energiari buruzko gai interesgarriei buruzko eztabaida-gune bat irekiko da. Parte-hartzaileak gehienez 20 izango dira; beraz, aldez aurretik izena eman beharko da, ingurumena@eibar.eus helbidera mezu bat bidalita. Saioaren aurretik, online bilerara joateko esteka bidaliko zaie izena eman dutenei. Informazio gehiago nahi izanez gero, deitu Eibarko Udaleko Ingurumen Sailera 943708408 telefonora.

Horrez gain, Gipuzkoako Foru Aldundiak, Energia Argitu programaren esparruan eta Eibarko Udalarekin lankidetzan, Ibilgailu elektrikoak eta mugikortasun iraunkorreko alternatiba izeneko bigarren online tailerra antolatu du ekainaren 9rako, 18: 00etan. Tailer horren helburua herritarrei mugikortasun iraunkorreko eredu berrien berri ematea da, gizartean pixkanaka sendotzen ari baitira. Zehazki, gaur egun merkatuan dauden ibilgailu elektrikoen ezaugarriak, kontsumoak, prezioak, kargatzeko eskakizunak eta beste alderdi batzuk ezagutaraziko dira, bai eta mugikortasun jasangarriko eta/edo alternatiboko beste modu batzuk ere (ibilgailu hibridoak, bizikletak eta patin elektrikoak, etab.). Era berean, gogoeta egingo da eguneroko mugikortasun-premiei buruz, motorrik gabeko mugikortasunerako aukerei buruz eta ibilgailu elektrikoen eredu partekatuen esperientziei buruz. Tailerrean parte hartu nahi dutenek aldez aurretik eman behar dute izena: Argitu@gipuzkoa.eus helbidean edo deitu 943 16 41 72 edo 605 75 76 87 telefono zenbakietara deituta. Tailerra gaztelaniaz egingo da, eta lantegian sortzen diren galderak edo zalantzak txat bidez helarazi ahal izango dira. Ahal den neurrian, lantegian bertan erantzungo dira, eta zuzenean erantzun ezin direnei posta elektronikoz erantzungo zaie.

Elkarrizketa, bideo labur eta on-line tailerrez gain, ekainaren 9, 10 eta 11n, 11: 00etatik 19: 00etara, informazio gune bat jarriko da Urkizuko plazan, Unzaga plazan eta Berdintasunaren pasealekuan. Puntu honetan, lantzen ari den Eibarko Klima Aldaketaren eta Energiaren Ekintza Planaren aurrerapenen berri emango da, eta herritarren ekarpenak jasoko dira plan hori aberasteko. Era berean, berotegi-efektuko zenbat gas isurtzen dituzten jakin nahi duten eibartarren CO2 arrastoa kalkulatuko da, eta, beraz, bakoitzak kliman duen eragina. Argindar fakturari buruzko zalantzak ere argituko dira; horretarako, interesdunek fakturetako bat aldean eramatea gomendatzen da.

Azkenik, ekainaren 5ean, Ingurumenaren Egunean, berdez argituko dira Eibarko Bizikleta Plaza eta Ibarkurutze iturria.

 

 

Gaiarekin zerikusia duten albisteak

« »